“Brexit”, Merkel i jep shpresa Britanisë për negociatat

Kancelarja gjermane foli para takimit të udhëheqësve të BE-së, ku ata priten që t’i bëjnë thirrje Londrës të përpiqet më shumë për të zgjidhur ngërçin e negociatave.

Sipas analistëve, kjo është një formë refuzimi i butë i kërkesës britanike për të nisur bisedimet për tregtinë, pavarësisht progresit të munguar.

“Do të diskutojmë çështjen e largimit britanik. Kemi progres, por jo mjaftueshëm për të nisur fazën e dytë. Por është progres inkurajues dhe puna do të vazhdojë për të nisur fazën e dytë në dhjetor”, tha Kancelarja e Gjermanisë, Angela Merkel.

Gjatë takimit të ditës së premte, ku Britania e Madhe nuk do të jetë e pranishme, 27 krerët e BE-së pritet gjerësisht të thonë se progresi i munguar nuk lejon kalimin në fazën tjetër të bisedimeve.

Tre çështje kryesore pa rakordim janë “të drejtat e qytetarëve”, “kufiri me Irlandën e Veriut” dhe “fatura e divorcit” që duhet të paguajë Britania.

Theresa May tha së fundmi se është urgjente që BE-ja të zgjidhë çështjen e qytetarëve, ndërsa Brukseli duket më këmbëngulës në dy çështjet e tjera, atë të kufirir irlandez dhe sidomos detyrimet financiare të Britanisë.

Top Channel