Clinton, në Britani: “Brexit”, një gënjeshtër e madhe

Ajo iu kërkoi më shumë grave të hynin në politikë dhe lëvdoi ato gra që denoncuan manjatin e “Hollywood”-it dhe donatorin e demokratëve, Harvey Weinstein.

Megjithatë, Clinton nënvizoi se edhe Donald Trump është akuzuar për agresion seksual dhe se ka një histori të gjatë të mizogjinisë, por pavarësisht kësaj, mbështetësit e tij janë të kënaqur që ai është në Zyrën Ovale.

Disa demokratë i kërkuan asaj të heshtte pas disfatës me Trump, por ajo nuk pranoi ta bënte këtë. Ajo këmbënguli që të luante rolin e saj në një përpjekje për të rifituar vendet demokratike në zgjedhjet e afërta të mesit të mandatit.

Ajo pranoi se, pas humbjes në zgjedhje, kishte qenë shumë pranë kolapsit, e zemëruar dhe e zhgënjyer, por ishte ringritur sërish.

Clinton ndodhet në Britani për të promovuar librin e saj me kujtime, të titulluar “What Happened” (Çfarë ndodhi).

“Kur e shoh referendumin për ‘Brexit’-in tani, mendoj se ishte një rrjedhojë e asaj që ndodhi te ne në SHBA. Gënjeshtrat janë një mekanizëm shumë i fuqishëm dhe ne, në njëfarë mënyre i pranojmë ato në demokracitë perëndimore, pjesërisht për shkak të lirisë së shtypit. Por duhet të ketë një nivel bazë faktesh dhe provash kudo”, tha Clinton.

Ajo i kërkoi Britanisë të tregohet e kujdesshme në lidhjen e marrëveshjeve të tregtisë me Trump, duke nënvizuar se ai nuk beson te tregtia e lirë.

Top Channel