Zëvendëspresidenti amerikan Mike Pence braktisi një ndeshje të futbollit amerikan, pasi disa lojtarë refuzuan që të ngrihen në këmbë për himnin kombëtar.
Ndeshja zhvillohej në Indiana, ku Pence është lindur, e pasi e braktisi atë zëvendëspresidenti tha se nuk mund të qëndronte në një kompeticion që nuk respekton ushtarët, flamurin dhe himnin amerikan.
Gjunjëzimi i lojtarëve në ndeshjet e Ligës Kombëtare të Futbollit është bërë një formë proteste ndaj padrejtësive racore.
Presidenti Donald Trump i ka kritikuar shumë ashpër lojtarët që gjunjëzohen gjatë himnit dhe i kërkoi NFL-së që t’i përjashtonte.
Në ndeshjen që Pence braktisi përballej ekipi Colt i Indianës me San Francisco 49ers. Ishte pikërisht një nga lojtarët e miqve që u gjunjëzua i pari, e më tej u pasua nga të tjerë.
Pence e kishte paralajmëruar praninë e tij në shkallët e stadiumit dhe pritej që ai të braktiste ndeshjen për shkak të gjunjëzimit të lojtarëve. Pavarësisht gjestit të tij, lindin natyrshëm pyetjet: a ia vlente që zv.presidenti të humbiste kohën për një deklaratë të tillë? Sa kushtoi udhëtimi që u pagua nga taksat e amerikanëve? Pa llogaritur publicitetin politik që ka zemëruar mjaft njerëz.
Top Channel
