Transporti i bagëtive, “Mesjetë” në rrugët e BE-së

BBC zbuloi se, në udhëtimet e gjata të kafshëve me kamionë përmes Europës, transportuesit shkelin rregullisht ligjet e BE-së për mbrojtjen e kafshëve.

Monitorimi nisi në Bullgari, pika e hyrjes së kafshëve nga Turqia dhe Lindja e Mesme për në BE, por sipas BBC-së, fenomi është vënë re edhe në transportin e kafshëve brenda Europës.

Gjatë 5 viteve të fundit, vetëm Britania e ka trefishuar eksportin e bagëtive të ndryshme, ndërsa në total në BE, vitin e fundit kjo tregti arriti në më shumë se 4 miliardë euro.

Një nga problemet kryesore janë kufijtë e Europës me vende si Turqia, ku radhët e gjata në dogana janë një torturë për kafshët, që gjenden edhe të ngordhura në makina.

Por, edhe brenda Europës, ku nuk ka kufij e pengesa të tilla, udhëtimet e gjata shpesh prej mbi 10 apo 15 orë, janë sërish dërrmuese për kafshët që i përballojnë ato pa ujë e ushqim.

Rregulloret ekzistojnë në masë, por transportuesit përpiqen dhe i shmangin rregullisht, pasi edhe kontrollet janë shumë të rralla. BBC-ja zbuloi gjithashtu se, kur kafshët dalin jashtë Europës, ato udhëtojnë për ditë të tëra drejt skajeve të Turqisë, Lindjes së Mesme apo edhe më larg, ku çdo rregullore për mbrojtjen e tyre apo standard sigurie humb çdo vlerë.

Sipas zyrtarëve të BE-së, implementimi i ligjeve është një problem që duhet riparuar, por aktivistët për mbrojtjen e kafshëve thonë se e kanë dëgjuar shpesh këtë dhe kurrë s’është bërë asgjë.

Top Channel