Presidenti venezuelian, Nicolas Maduro ka thurur lavde pas vendimit për lirimin nga burgu të një prej figurave kryesore të opozitës së vendit, Leopoldo Lopez. Ky i fundit ka lënë qelinë për të mbetur nën arrest shtëpiak, pas mbi 3 vitesh të kaluara prapa hekurave. Ai doli nga një burg pranë Karakasit, e u ribashkua me familjen ditën e shtunë.
Lopez ishte dënuar me 14 vite burgim për nxitje të dhunës gjatë protestave antiqeveritare të vitit 2014, një akuzë që ai e kishte mohuar gjithnjë. Gjykata Supreme e Venezuelës tha se lirimi i tij ishte bërë për shkaqe shëndetësore.
Maduro tha se e respektonte dhe mbështeste vendimin e Gjykatës Supreme, por bëri thirrje ndërkohë për “mesazhe paqeje dhe korrigjimi” në vend. Vetëm pak orë pasi u lirua, Lopez u bëri thirrje mbështetësve të tij të vazhdonin protestat në rrugë kundër Maduros.
Opozita venezueliane dhe fuqitë ndërkombëtare kanë ushtruar prej kohësh presion për lirimin e tij. Kreu i unionit rajonal Organizata e Shteteve Amerikane, Luis Almagro tha se vendimi i gjykatës ofronte një mundësi për pajtim kombëtar.
Henrique Capriles, një ish-kandidat presidencial nga opozita, theksoi se “atij i duhet dhënë liria e plotë, sikurse edhe të gjithë të burgosurve të tjerë politikë”.
Ndërkohë, babai i Lopezit tha se i biri mban tashmë në dorë një byzylyk elektronik, në mënyrë që autoritetet të jenë në dijeni të lëvizjeve të tij.
Top Channel
