![](https://top-channel.tv/wp-content/uploads/2024/04/Jorgo-Goro-i-Himares_sd_sd-800x450.jpg)
Ministria e Drejtësisë ka rikonfirmuar këtë të hënë pezullimin e sekretarit të përgjithshëm të saj. Reagimi i MD ka ardhur pas një perpjekjeje të zyrtarit të pezulluar për të hyrë me forcë në ambjentet e dikasterit.
“Urdhëri i ministrit të Drejtësisë, me anë të të cilit është urdhëruar pezullimi nga detyra i sekretarit të përgjithshëm të Ministrisë së Drejtësisë është në fuqi. Asnjë institucion tjetër shtetëror, përfshirë Departamentin e Administratës Publike apo Komisionerin e Mbikëqyrjes së Shërbimit Civil nuk ka cenuar vlefshmërinë e aktit të pezullimit të miratuar nga Ministri i Drejtësisë, për shkak se autoritetin kushtetues për ta bërë këtë e ka vetëm sistemi gjyqësor në vend. Çdo pretendim tjetër në këtë drejtim është manipulim i opinionit publik dhe tregues i qartë i mungesës së njohurive minimale juridike”, thuhet në një njoftim për shtyp.
Sipas ministrisë, ditën e sotme zyrtari i pezulluar ka tentuar këtë të hënë të hyjë në mënyrë të paligjshme dhe me forcë, një akt sipas saj që është “vijim i akteve të paligjshme të ndërmarra gjatë kësaj kohe, si dhe vazhdim i përpjekjeve për të penguar institucionin e Ministrisë së Drejtësisë që të zbatojë ligjin”.
Top Channel