Presidenti rus Vladimir Putin sugjeroi se piratë kibernetikë patriotë mund të kenë ndërhyrë në zgjedhjet amerikane, por kurrsesi aktiviteti i tyre nuk ka qenë i financuar nga Moska.
Kjo përbën herën e parë, që udhëheqësi i Kremlinit duket se pranon mundësinë që sulme kibernetike në lidhje me zgjedhjet në vendet e tjera, mund të kenë nisur nga vendi i tij.
Gjatë Forumit Ekonomik të Shën Pjetërburgut, Putin i krahasoi “hacker”-at me artistët që mund të veprojnë në emër të Rusisë, nëse mendojnë se interesat e vendit të tyre po kërcënohen.
“Artistët mund të veprojnë në emër të vendit të tyre dhe të pikturojnë diçka. Njësoj ndodh edhe me ‘hacker’-at, nëse lexojnë apo shohin diçka për lidhjet mes shteteve. Nëse janë patriotë, ata kontribuojnë në një mënyrë që mendojnë se është e drejtë dhe luftojnë kundër atyre, që thonë gjëra të këqija për Rusinë”, tha Vladimir Putin, president i Rusisë.
Putin mohoi kategorikisht që “hacker”-at të jenë ndihmuar nga shteti rus, pasi tha se Kremlini nuk bën gjëra të tilla. Por shtoi gjithashtu se, “hacker”-at, përmes aktivitetit të tyre kibernetik, nuk mund të ndikojnë dot zgjedhjet në asnjë vend, pasi piratët kibernetikë janë të zotë me teknologjinë, por nuk kanë qasje në mendjet dhe bindjet e njerëzve.
Top Channel
