Pas një dite intensive të diplomatëve në Tiranë dhe veçanërisht ambasadorit amerikan Donald Lu, Edi Rama dhe Lulzim Basha thirren edhe njëherë në zyrën e Bujar Nishanit.
Megjithëse shpresat janë të pakëta, presioni i zgjedhjeve në Kavajë pas pak ditësh dhe oferta McAllister mund të jenë korniza e një kompromisi mes qeverisë dhe opozitës.
Ndryshe nga takimi i një dite më parë, kur Basha hyri pak minuta më vonë në Presidencë, pasditen e së enjtes Kryeministri dhe kreu i PD-së hynë thuajse njëkohësish,t këtë herë jo në tryezë, por në kolltuqe më të rehatshme.
Po ashtu, për dallim nga takimi i së mërkurës, në këtë tryezë Rama nuk ka në krah të tij kreun e grupit parlamentar socialist, Gramoz Ruçi, e po ashtu as Basha Edi Palokën.
Takimi u thërrit nga Presidenti në orët e drekës.
“Me ftesë të Presidentit të Republikës, Sh. T. Z. Bujar Nishani do të zhvillohet një takim i dytë midis Kryeministrit të vendit, zotit Edi Rama dhe Liderit të opozitës, zotit Lulzim Basha sot 4 maj, në orën 19.00 në Institucionin e Presidentit të Republikës”, thuhej në njoftimin e Presidencës.
Gjatë ditës, shefi i Qeverisë është takuar dy herë me ambasadorin amerikan në Tiranë, Donald Lu, ndërkohë që nga çadra e protestës, ish-Kryeministri Sali Berisha deklaroi se në takimin e parë të thirrur nga Presidenti Nishani, Kryeministri Rama ofroi më pak nga sa kishte propozuar McAllister.
“Tre ditë më parë deklaronte se unë do të bëj çfarë të thotë PPE-ja, kurse dje i thoshtë në takim Lulzim Bashës ‘as që i njoh fare ato propozime’. Edvin, mos i rri larg zgjidhjes politike, se alternativë do të kesh vetëm zgjidhjen fatale. Zgjidhje mëshire, por edhe mëshira ka një kufi, edhe ajo po u tejkalua, pastaj të pret fataliteti, të cilin e meriton në çdo formë”, tha Berisha.
Top Channel
