Gjykata Administrative e Shkallës së Parë pranoi padinë e 38 banorëve të fshatit Kute në Mallakastër, të cilët prej muajsh kundërshtojnë ndërtimin e hidrocentralit të Poçemit në rrjedhën e poshme të lumit Vjosa.
Gjyqtari Avni Sejdi deklaroi të pavlefshëm urdhrin e ministrit të Energjitikës dhe Industrisë dhe çdo akt tjetër që i paraprin atij për realizimin e procedurave koncensionare.
Gjykata u shpreh se banorët nuk ishin përfshirë në dëgjesën publike për këtë investim, megjithëse ata janë pala e interesuar. Sipas gjykatës, rezultoi e provuar se ka patur vetëm një seancë për të përfshirë komunitetin e këtyre fshatrave dhe takimi nuk është realizuar pranë zonës ku do investohej, por në Fier.
Sipas gjykatës, evidentohet se në këtë takim, lista ka qenë fiktive dhe jo me emrat e banorëve. Ndërtimi i hidrocentralit, sipas trupës gjyqësore, influencon në mjedis. Të njëjtën gjë tha gjatë përfaqësimit të 38 banorëve nga Poçemi edhe avokati Vladimir Meçi, sipas të cilit, një investim i tillë ka ndikim negativ në lumin Vjosë.
Është hera e parë që banorë vijnë në një gjyq të tillë.
Top Channel
