Nga Fieri, kryetari i ri i Lëvizjes Socialiste për Integrim, Petrit Vasili lëshoi akuza për klasën politike, për mungesën e vëmendjes ndaj sipërmarrjes.
“Sepse pa sipërmarrje, pa zhvillim të tillë ekonomik dhe shoqëror, Shqipëria nuk mund të bëjë përpara. Shqipëria nuk mund të jetë më e begatë dhe të gjitha fjalët që politika thotë, do të jenë ato fjalët boshe, mbi bazat e atyre premtimeve që vetë politikanët as vetë nuk i besojnë”, tha Vasili.
Në takim me sektorin privat ishte dhe kandidatja për deputete në Qarkun e Fierit, Erisa Xhixho, e cila nënvizoi se biznesi privat ka nevojë për stabilitet politik që të sigurojë investimet vendase e të huaja.
“Interesi madhor është që të kenë një Shqipëri të stabilizuar politikisht, por edhe ekonomikisht. Janë kyç për zhvillimin e ekonomisë. Unë besoj fort se nëqoftëse politika i jep një vëmendje akoma më të madhe sektorit privat, padyshim që kjo do të sjellë hapjen e vendeve të reja të punës”, deklaroi Xhixho.
E në kuadër të ditës së punëtorëve, Petrit Vasili, me anë të një postimi në Facebook, ka nënvizuar se LSI ka një shans për të gjithë punëtorët me më shumë vende pune, punë më të mirëpaguara e me kushte sigurie më dinjitoze, më shumë të drejta për punëtorët.
Top Channel
