Bashkia e Maliqit ka nisur punën për rehabilitimin e Pyllit të Fazanëve, për ta kthyer në një pikë turistike për vendas e të huaj.
Synimi është që pyllit, i shpallur monument natyre në vitet ‘60, t’i rikthehen edhe kafshët dhe shpendët. Fazani prej të cilit ka marrë edhe emrin është zhdukur prej vitesh dhe një ndër projektet do t’i kushtohet rritjes së tyre.
Konkretisht, bashkia ka nisur punën për ndërtimin dhe ndriçimin e rrugës hyrëse për në Pyllin e Fazanëve. Po rikonstruktohen dy ndërtesave ekzistuese brenda pyllit, njëra prej të cilave do të shërbejë si muze dhe do të vazhdohet me rrethimin me rrjetë.
“Ne po punojmë që ta kthejmë në identitet duke restauruar godinat ekzistuese, por jo vetëm kaq. Duke bërë edhe rrethimin. Kemi aplikuar për projekte të vecanta në BE, për të cilat kemi sinjale pozitive. Por ajo c’ka po bëjmë për momentin është restaurimi i godinave dhe mbrojtja e pyllit që është kryesorja”, ka deklaruar kryebashkiaku Gëzim Topçiu.
Edhe pse si monument natyre dhe gëzon shkallën e parë të mbrojtjes, ky pyll prej vitesh është lënë pas dore dhe llogaritet që nga sipërfaqja prej 50 hektarë disa prej tyre janë rrafshuar totalisht.
Top Channel
