Veliaj: Transformimi i Tiranës, i dukshëm

09/04/2017 00:00

Zona e Bregut të Lumit së shpejti do të ketë një kopsht, çerdhe, shkollë dhe një qendër të re sociale, të cilat do tu vijnë në ndihmë qytetarëve.

Kryetari i Bashkisë së Tiranës, Erion Veliaj ka premtuar se do ta shndërrojë Bregun e Lumit në një nga destinacionet më moderne të Tiranës, ndërkohë që në lidhje me debatin politik të ditëve të fundit, kryebashkiaku thekson: “Ajo që presin qytetarët nga ne është që të përveshim krahët dhe të vazhdojmë punën. Nëse dikush nuk ka bërë punë dhe për këtë arsye nuk ka çfarë ofron e nuk do të vijë në zgjedhje, kjo nuk duhet të jetë problem dhe dramë e të gjithë qytetarëve shqiptarë. Ama, kush ka bërë punë dhe kush do të bëjë akoma më shumë punë, duhet të paraqesë ofertën e vet në datë 18 qershor dhe të na tregojë se si mund të bëjmë më shumë kopshte, më shumë çerdhe, më shumë rrugë, më shumë tregje si Pazari i Ri, më shumë rrugë si Bulevardi i Ri, më shumë sheshe si sheshi “Skënderbej”, më shumë kënde lodrash”.

Ndërsa ka inspektuar punimet në këtë qendër multifunksionale, Veliaj është shprehur për një ofertë të qartë në zgjedhjet e 18 qershorit, përkundrejt çadrës së opozitës të ngritur në bulevard.
 
“Jam gati bashkë me skuadrën dhe me deputetët e Tiranës që të shkojmë në datën 18 qershor me një ofertë që e çon në marsh të pestë energjinë tonë të këtyre muajve të fundit. Besoj se në Tiranë gjërat flasin vetë. E mirëkuptoj pse dikush është në çadër, pse nuk bëri dot një punë në Tiranë, le më të marrë përsipër të bëjë punë në Shqipëri. Është shumë e rëndësishme që karvani të ecë përpara dhe është shumë e rëndësishme që të gjithë ata qytetarë që në fund të ditës presin përgjigje në çfarë shkolle do i çojnë fëmijët, në çfarë çerdhe, kush do t’i ndihmojë në ditën e tyre të nevojës, ne t’i kemi përgjigjet. I kemi përgjigjet dhe do të jemi aty me një ofertë politike për punë konkrete, kurse për llafe duhet të gjejnë dikë tjetër”, tha Veliaj.

Qendra multifunksionale që po ndërtohet në zonën e Bregut të Lumit është konceptuar që në orët e pasdites të shërbejë si qendër komunitare, ku terrenet sportive të shfrytëzohen nga banorët apo në këto ambiente të ofrohet terapi për personat me aftësi të kufizuar si dhe të ofrohen vakte ushqimi për personat në nevojë.

Top Channel

DIGITALB DIGITALB - OFERTA