Kryeministri Edi Rama ishte në Fier për të inspektuar punimet në kuadër të projektit të “Rilindjes Urbane” të qytetit të Fierit.
Shoqëruar nga ministrja Eglantina Gjermeni dhe kryebashkiaku Subashi, kreu i qeverisë pa nga afër projektet e rivitalizimit të rrugëve kryesore dhe Parkut Qendror të Fierit, me vlerë qindra milionë lekë. Projektet parashikojnë ndërtimin e një parku të madh urban me zona rekreative dhe hapësira për artin dhe kulturën, lirimin e hapësirave publike dhe sistemimin e infrastrukturës.
Rama ka inspektuar edhe tregun e fruta-perimeve të qytetit, që sipas projektit do të ketë 102 tezga për fermerët e Fierit dhe zonat përreth. Pas inspektimit në qytet, kryeministri ndoqi nga afër punimet në Pojan për pastrimin e kanaleve vaditëse dhe ujitëse, nga i cili pritet të preken 6800 hektarë tokë dhe përfitojnë rreth 11 mijë fermerë.
Ndalesa e fundit e kreut të qeverisë ishte në Parkun Arkeologjik të Apollonisë, i cili do t’i nënshtrohet restaurimit, që pritet të sjellë një rritje të numrit të vizitorëve këtë vit.
“E gjitha është restauruar. Projekti i plotë i rehabilitimit të të gjithë parkut të Apolonisë, një investim prej 750 mijë eurosh. Për të parën herë projekti është i plotë që nga masterplani deri tek sistemi inxhinierik, deri tek sistemi elektrik, sistemi i pompave të ujit e deri tek itineraret e turistëve. Jemi shumë afër inaugurimit, kështu që presim të ketë një “boom” vizitorësh këtë vit”, tha Mirela Kumbaro, ministre e Kulturës.
Top Channel
