Gjykata e Korçës ka lënë në fuqi masën e sigurisë arrest me burg për autorin e dyshuar të vrasjes për pazare droge në fshatin Braçanj të Devollit.
David Myrte, banor i këtij fshati, në seancën gjyqësore të zhvilluar me dyer të mbyllura ka refuzuar akuzat duke dhënë edhe alibinë e tij.
“Nuk kam lidhje me ngjarjen. Nuk jam unë autori. Personi që më identifikon mua është në lajthitje. Më ngatërron. Unë kam qenë me vëllain dhe shokët e mi në fshat dhe ata mund ta dëshmojnë këtë gjë, por policia nuk pranon dëshminë e tyre pa urdhrin e prokurorit të çështjes”, është shprehur ai para gjykatës.
Ngjarja ndodhi të shtunën në mbrëmje, kur tre persona u sulmuan me sende të forta pranë varrezave të fshatit.
Prokuroria e Korçës, në sajë të bashkëpunimit të njërit prej tyre, arriti në përfudndimin se grindja ndodhi për një shumë prej 12 mijë eurosh, që Zarif Aliu, i cili vdiq më pas në spital, duhet t’i jepte një personi për tregti hashashi.
Shoku i tij arriti të identifikonte si një prej autorëve, pikërisht David Myrten nga fshati Braçanj.
Top Channel
