Harold Hayes, i mbijetuari i fundit i një grupi mjekësh dhe infermierësh që kaluan 9 javë në Shqipërinë e pushtuar nga nazistët gjatë Luftës së Dytë Botërore, ka ndërruar jetë në moshën 94-vjeçare.
Të 30 burrat dhe gratë e grupit arritën të shpëtonin falë ndihmës së dhënë nga partizanët, por që të mos i rrezikonin mbrojtësit e tyre, u detyruan ta mbanin sekret atë që kishte ndodhur.
Hayes, bashkë me 12 mjekë, 13 infermiere e 4 pjesëtare ekuipazhi, u ngjitën 8 nëntorin e vitit 1943 në bordin e një avioni transporti dymotorrësh. Fluturimi i tyre në Siçili duhej të zgjaste dy orë. Qëllimi ishte të ndihmoheshin ushtarët e plagosur në Itali. Por moti i keq e detyroi mjetin të devijonte kurs e të sulmohej më pas nga avionët luftarakë gjermanë. Piloti arriti me shumë vështirësi të ulej në Shqipëri.
Një 23-vjeçar u dëmtua rëndë në gju dhe shokët e tij e mbajtën në krahë me radhë. Gjatë rrugës u përballën me dizanterinë, mungesën e ushqimit dhe rrezikun e patrullave gjermane. Pas kësaj do të shpalleshin të humbur në aksion, megjithatë Inteligjenca britanike mësoi në fund të nëntorit se ishin gjallë të gjithë, e nga këtu mori udhë plani amerikano-britanik i shpëtimit.
9 janarin e atij viti, 10 infermiere, mjekët dhe anëtarët e ekuipazhit u larguan me një varkë britanike. Tre infermiere që mbetën prapa arritën të iknin nga qyteti i Beratit marsin e 1944-s. Largimi u mbajt i fshehtë për vite të tëra, sepse disa prej partizanëve që i ndihmuan amerikanët u ekzekutuan prej nazistëve, e pas luftës, kush dyshohej se kishte mbrojtur mjekët dhe infermierët u vra me urdhër të Enver Hoxhës.
Top Channel
