Turqia ka kërcënuar të anulojë marrëveshjen me Bashkimin Europian për frenimin e fluksit të emigrantëve që kalojnë drejt Greqisë. Kjo, për shkak se zyrtarët turq janë të pakënaqur nga vendimi i Gjykatës Supreme të vendit fqinj, që vendosi të mos i ekstradonte 8 ushtarakët dezertorë, që mbërritën në Greqi pas përpjekjes së dështuar për grusht shteti në korrik të vitit të kaluar.
Ministri i Jashtëm turk, Mevlut Cavusoglu e përshkroi vendimmarrjen si një “vendim politik” dhe kërkoi rigjykimin e tyre. Ndërkohë, zëdhënësja e BE-së ka reaguar duke thënë se unioni është besimplotë se marrëveshja për emigrantët do të qëndrojë në fuqi.
Ushtarakët, prej të cilëve 3 majorë, 3 kapitenë dhe 2 rreshterë, u larguan me helikopter drejt Greqisë pas puçit të 15 korrikut të vitit të kaluar. Ata akuzohen se kanë luajtur një rol të rëndësishëm në atë përpjekje për grusht shtetit, dhe se kanë lidhje me një grup që pretendohet se u përpoq të vriste presidentin Recep Tayyip Erdogan, gjatë asaj nate makabre.
Ata vet mohojnë të jenë përfshirë dhe kanë shfaqur frikën se jetët e tyre rrezikohen nëse do të ekstradoheshin në Turqi. Gjykata Supreme e Greqisë vendosi se ata mund të mos përballeshin me një gjyq të drejtë në Turqi, nëse ktheheshin mbrapsht. Por Cavusoglu i quajti ata “tradhtarë”.
“Ne kërkojmë që 8 ushtarakët të gjykohen sërish”, tha ai për rrjetin televiziv “TRT Haber”. “Ky është një vendim politik. Greqia po mbron dhe po strehon komplotuesit e grushtit të shtetit. Jemi duke vlerësuar hapat që do të ndërmarrim. Por ekziston një marrëveshje për emigrantët që ne e kemi nënshkruar, përfshi ripranimin e refugjatëve ilegalë nga Greqia, ndaj jemi duke vlerësuar se ç’mund të bëjmë, përfshi edhe anulimin e ripranimeve nga vendi fqinj”.
Ministri turke e Drejtësisë ka bërë një tjetër kërkesë për ekstradim, sipas asaj që informon agjencia shtetërore e lajmeve “Anadolu”. Ndërkohë, mediet turke njoftuan ditën e enjte se ishin lëshuar edhe mandatarreste për 8 ushtarakët.
Bazuar mbi marrëveshjen me BE-në, që hyri në fuqi marsin e vitit të kaluar, Turqia merr mbrapsht emigrantët që kalojnë në Greqi nëse ata nuk aplikojnë për azil, ose nëse kërkesat e tyre refuzohen. Turqia ka kërcënuar ta ndalë pjesëmarrjen në këtë marrëveshje edhe herë të tjera.
Top Channel
