Presidenti amerikan Donald Trump duket se i ka vënë me shpatulla pas murit meksikanët, edhe pse këta të fundit refuzuan përmes presidentit Enrique Pena Nieto të paguajnë për ndërtimin e tij në kufirin mes dy vendeve.
Deklaratat sfiduese të ditës së sotme duket se kanë një epilog jo të pëlqyeshëm. Pas adresimit përpara kombit të Pena Nietos, kur deklaroi se Meksika nuk do të paguajë për murin, erdhi reagimi i Trumpit, i cili ftoi homologun meksikan të mos vinte fare në SHBA në takimin e parashikuar për javën e ardhshme. Dhe presidenti meksikan kështu bëri, njoftoi pak orë më vonë anulimin e vizitës së tij në Amerikë.
Por në mbrëmje, Trump deklaroi se do të kërkonte vendosjen e një takse prej 20% për të gjitha mallrat e importuara nga Meksika, për t’i përdorur më pas këto të ardhura për ndërtimin e murit kufitar. Të paktën kështu informoi zëdhënësi i Shtëpisë së Bardhë.
Plani i Trump u njoftua shumë shpejt pas anulimit të vizitës së Pena Nietos në Uashington, në mes të mosmarrëveshjeve të krijuara mbi atë se kush do të paguajë për ndërtimin e pengesës ndërkufitare, i cili gjithsesi do të ndërtohet, pasi Trump nënshkroi një urdhër ekzekutiv të mërkurën. Detyrimi i Meksikës për të paguar për të ishte një prej premtimeve kryesore të fushatës së tij.
Zëdhënësi i Shtëpisë së Bardhë, Sean Spicer u tha reporterëve se presidenti e kishte diskutuar këtë plan me ligjvënësit dhe se ata po konsiderojnë ta bëjnë atë pjesë e paketës së re të reformës së taksave, që po shqyrtohet nga Kongresi amerikan. Sipas tij, një taksë e tillë do të gjeneronte rreth 10 miliardë dollarë në vit. Kostoja e murit është përllogaritur në rreth 15-25 miliardë dollarë, gjë që do të nënkuptonte se Amerika do t’i nxirrte shpenzimet brenda një viti e gjysmë apo dy e gjysmë.
Më herët, duke folur para kongresmenëve republikanë të mbledhur në Filadelfia, Trump tha se nuk kishte pasur zgjidhje tjetër përveçse të anulonte takimin e planifikuar me presidentin meksikan, pasi ai nuk do të ishte i frytshëm për sa kohë që Meksika nuk e trajton Amerikën me respekt.
“Ora e drejtësisë për punëtorët amerikanë ka ardhur. Siguria në kufi është një çështje serioze kombëtare. Mungesa e sigurisë përbën një kërcënim serioz për sovranitetin dhe sigurinë e SHBA-ve dhe qytetarëve të saj. Numri më i madh i emigrantëve vjen nga kufiri ynë jugor. Unë e kam thënë shumë herë, që populli amerikan nuk do të paguajë për murin”, tha Trump.
Trump tha në vijim se do të nënshkruante një numër marrëveshjesh tregtare dypalëshe, si kundërpeshë e marrëveshjeve të hedhura poshtë, si ajo e partneritetit transpaqësor.
“Më besoni, do të ketë shumë marrëveshje të reja tregtie. Dhe nëse një vend i caktuar nuk na trajton me ndershmëri, do t’u dërgojmë një njoftim 30-ditor për ndërprerje; ata do të vijnë të na thonë ‘Ju lutemi mos e bëni këtë’. E atëherë, brenda 30 ditësh, ne do të negociojmë një marrëveshje edhe më të mirë”, tha Trump.
Republikanët e Kongresit janë mbledhur në Filadelfia në një takim treditor, për të përcaktuar axhendën e re legjislative, në një kohë kur partia ka kontrollin e Shtëpisë së Bardhë, Senatit dhe Dhomës së Përfaqësuesve, për të parën herë në një dekadë.
Top Channel
