Nëse nuk do të arrijë të fitojë titullin në kampionatin francez, për Paris Sën Zhermenin dhe trajnerin Unai Emeri ky do të konsiderohet një sezon i dështuar. Kampionët e Francës po vuajnë për të vendosur supremacinë në ligën transalpine pavarësisht kualiteteve, diçka të cilën numri 1 i pankinës ia faturon pjesërisht boshllëkut të lënë nga Zlatan Ibrahimoviç.
Ish-kapiteni i Suedisë shënoi 50 gola në 51 sfida me fanelën e parizienëve, duke ndihmuar PSG të triumfonte sërish sezonin e kaluar para se të firmoste me Mançester Junaitid. Ndërkohë, Emeri, i cili zëvendësoi Loran Blank në pankinë, po vuan për të gjetur stabilitetin me rezultatet e kryeqytetasve francezë.
“Kur unë erdha te Paris Sën Zhermeni më flisnin shumë për Ibrahimoviçin dhe kjo është normale, pasi ishte një prej lojtarëve më të mirë në historinë e klubit. Ne po mësohemi të luajmë pa të në fushë. Edinson Kavani shënon shumë dhe zhvillon ndeshje fantastike kur ka besimin e duhur. Duhet të punoj me klubin për pjesën tjetër”, tha trajneri Emeri.
Top Channel
