Kryetari i PD, Lulzim Basha ka deklaruar pas mbledhjes së grupit përkatës parlamentar se janë vënë piketat që kanë të bëjnë me reformën zgjedhore, e cila, siç ka thënë ai, do të jetë kushti i radhës i opozitës.
“Grupi ynë finalizoi diskutimet për reformën elektorale. Vendosëm t’i propozojmë komisionit ad hoc për reformën zgjedhore votimin elektronik me shenjat e gishtërinjve, kontrollin e financave të partive dhe kriminalizimin e donacioneve private, përmes financimit 100 për qind nga buxheti i shtetit. Gjithashtu, vendosëm të propozojmë lirinë e medias dhe hapësirën e barabartë mediatike dhe të tjerë parametra europianë për zgjedhje të lira dhe të ndershme”, ka thënë Basha.
Por një prej parametrave të përmendur prej tij duket se do të jetë i vështirë të realizohet, në mos i pamundur. “Parametrat janë për një qeveri teknike, sepse Rama ka treguar se nuk është në gjendje të garantojë zgjedhje të lira e të ndershme. Pa një reformë zgjedhore, asgjë tjetër nuk do të funksionojë normalisht në vend”, ka nënvizuar Basha.
Në prononcimin për mediat, Basha ka folur për një ditë të bukur politike, pasi sipas tij janë kurorëzuar përpjekjet disavjeçare të opozitës, duke filluar nga vendimi i gjykatës për heqjen e mandatit të Koço Kokëdhimës.
“Ditë shumë e bukur sot jo thjesht për nga moti, por sepse është dita kur simboli i oligarkisë, Koço Kokëdhima mori sot atë që donte çdo qytetar: heqjen e mandatit për abuzimin me Kushtetutën, për korrupsionin, për përfitim të parave të taksapaguesve shqiptarë. Para që në vend që të kthehen në rroga e pensione më të larta përfundojnë në xhepat e oligarkëve, si në rastin e kryeoligarkut të jugut Koço Kokëdhima”, ka thënë Basha.
Sipas tij, kjo është jo vetëm një fitore e PD që ka mbrojtur të drejtën e kauzës kundrejt Koço Kokëdhimës, por është një fitore e të gjithë atyre që duan një politikë të pastër nga konflikti i interesit.
Arsyeja tjetër përse kjo sipas Bashës është një ditë e bukur është sepse, “po fillojnë të kërcasin ingranazhet e krimit të veshur me pushtet dhe pushtetit të veshur me krim nga pesha e ligjit të dekriminalizimit”.
“PD fton të gjithë qytetarët të bëhen pjesë e zbatimit të këtij ligji përmes denoncimeve në një portal për ato që dinë për zyrtarët e fshatit, qytetit, apo edhe ministrat. Le ta bëjmë këtë ligj efektiv, duke larguar nga politika dhe vendimmarrja njerëzit me rekorde të tmerrshme kriminale”, ka thënë Basha.
Top Channel
