“Top Story”, Bojaxhi: Sulm politik. Gati të bëj testin për të gjitha akuzat e ngritura

Sokol Balla: Në Shqipëri është normalitet që një element i ri politik, i cili duket se vendos në rrezik palët kryesore të politikës, bën që këta të fundit të çfarëdo krahu ta sulmojnë. Në pjesën e parë të emisionit, Bojaxhi është përpjekur t’u përgjigjet akuzave si biznesmen dhe vjen pikërisht në cilësinë e personit nën hetim. Ju erdhi e papritur kjo që po ndodh?

Gjergj Bojaxhi: Më shumë e papritur është fakti që përfshihen anëtarë të familjes sime, me një kosto të dhimbshme për ne por edhe për jetën politike në këtë vend. Gjithnjë na surprizojnë me të tilla gjëra politikanët shqiptarë. Sot do të uroja shqiptarët edhe ditën e Shën Gjergjit, i cili ka vrarë me shigjetë dragoin…

Sokol Balla: Sa i shenjtë është Gjergj Bojaxhi?

Gjergj Bojaxhi: Nuk jam qytetari më i mirë, absolutisht që ka shumë më të përsorur se mua, por për akuzat që më kanë bërë jam i bindur se jam një qytetar i rregullt dhe tëpër korrekt me ligjin.

Sokol Balla: Si gazetar kam sensin e skepticizmit për gjithçka. Rëndësi ka që publiku të kuptojë më shumë për atë që po ndodh, sepse akuzat nuk janë të lehta. Të flasim për kompaninë që ju keni ngritur. E çfarë natyre?

Gjergj Bojaxhi: Kompania “Everest” është regjistruar në korrik të 2012-s dhe ka marrë këtë emër nga aksionerët e kompanisë, sigurisht edhe për arritjen tonë që ngjitëm majën më të lartë të botës.

Sokol Balla: “Everest Oil” nuk është themeluar prej jush, por nga një tjetër shoqëri, që sipas hetimit policor “Superba Srl”, italiane me seli në Napoli (por ju thoni në Gjenovë), ku aksionerë janë bashkëshortja juaj dhe disa të tjerë. Për kuotat e reja ju keni paguar diku 10 mijë dollarë. Një i afërm i juaji është aksioner gjithashtu. Vet “Superba” është themeluar shumë pak kohë nga themelimi i “Everestit”, në fund të të cilës del emri i Otto Lenghit, si pronar i gjithçkaje.

Gjergj Bojaxhi: Kompania ime nuk është themeluar nga “Superba”, le ta ndihmojmë edhe Policinë e Shtetit të marrë informacione më të sakta. Nuk kishin pse të lodheshin kaq shumë dhe mund të më kishin thirrur për t’iu dhënë informacion. Shoqëria është krijuar nga disa aksionerë, përfshi edhe bashkëshorten time. Këtu nuk ka gjë për t’u fshehur, sepse informacioni është publik në faqen e QKR-së, ku mund të gjendet i gjithë historiku. Asgjë nuk është jonormale në këtë mes. Unë jam emëruar si administrator i kompanisë dhe 10% më është dhënë për të pasur mundësi të jem aksioner, në mënyrë që të punoj duke mbajtur përgjegjësi për këtë. Otto Lenghi ka punuar me shtetin shqiptar që në vitin 2004, kur është punuar për Petroliferën në Vlorë, është takuar me të gjithë politikanët në pushtet dhe opozitën e asaj kohe. Është një qytetar i rregullt dhe një investitor shumë i rëndësishëm dhe serioz. Deri këtu çdo gjë është publike dhe në përputhje me ligjin, kështu që nuk kuptoj se çfarë ka për t’u trajtuar si pjesë e një hetimi. Nuk besoj se ndonjëri të jetë kundër barazisë gjinore në këto aksione. Ne kemi të deklaruara të gjitha të ardhurat e fituara në emigracion, por edhe gjatë punëve të ndryshme.

Sokol Balla: Të qëndrojmë te zoti Lenghi, që është pronar i Petroliferës rumune, pronare e përgjithshme edhe e Petroliferës shqiptare. Por a ka një lidhje interesash mes këtyre kompanive?

Gjergj Bojaxhi: Këto kompani janë zbatueset më të rregullta të ligjeve kudo ku shtrihen, në Itali, Rumani apo Shqipëri. Lidhje pronësie mes këtyre bizneseve ka, por është në përputhje të plotë me ligjin, dhe nuk kuptoj se çfarë ka këtu që shkel ligjet apo moralin. Nuk e di ende problemin e policisë.

Sokol Balla: A mund të quhet kjo një skemë e ngjashme me kompanitë guackë, siç u zbulua skandali i fundit “Panama Papers”?

Gjergj Bojaxhi: Nuk jam jurist, megjithatë nga informacioni që unë kam, nuk ka asgjë që Everesti të ketë të bëjë me kompanitë e tjera. Ajo është e regjistruar në Shqipëri dhe paguan dividentin dhe taksë për dividentin rregullisht. Policia e Shtetit nuk dëshiron ta marrë informacionin e plotë dhe gjoba që na është vënë është vendosur nga drejtori i Tatimeve të Tiranës, i cili sot është nën arrest. Ajo është apeluar brenda institucioneve të Tatimeve dhe Apeli e ka rrëzuar këtë, sikurse edhe Gjykata Administrative. Raporti është qartazi me informacion të vjetër. Kompania Everest ka paguar aq shumë taksë vitin e kaluar, saqë shteti shqiptar na ka detyrim të na kthejë diçka, pasi kemi paguar më shumë se ç’duhej. “Everesti” nuk transferon fonde jashtë, përveçse kur paguan dividentin, që tatohet sipas ligjit shqiptar. Ne kemi kompani telekomunikacioni në Shqipëri, që fitimet i bëjnë këtu dhe i transferojnë në vende të tjera pa paguar taksë. Unë nuk di si bëhen kompanitë guackë, por ju siguroj se me të gjithë punën që bëjmë e kemi transparente, duke zbatuar ligjet dhe standardet e shtetit shqiptar.

Sokol Balla: A ka lidhje mes aksionerëve tuaj dhe “Superbas”? Cili është fokusi i aktivitetit të “Everest Oil”, kompanisë që ju administroni?

Gjergj Bojaxhi: Kompania ime nuk ka bërë import apo eksport, por ndërmjetësim të produkteve të kompanive të mëdha, sepse kompanitë e mëdha nuk kanë përfaqësi në Shqipëri. Ata gjejnë kompani lokale dhe në bazë të tyre bëjnë shitjet e tyre. Në Vlorë kemi një kontratë depozitimi, duke paguar qira për çdo ngarkesë, ndaj dhe të gjitha gjërat e thëna për xhirot e mëdha janë të pasakta. Ne thjesht menaxhojmë shitjet dhe volumin, por nuk marrim risk mbi vete, ndaj dhe nuk deklarohet i gjithë volumi si fitim i yni. Kemi deklaruar çdo gjë që nga dita e themelimit e deri më sot. E gjitha kjo skenë e madhe e ndërtuar nuk ka justifikim normal sesi shteti trajton një biznes. Ne si kompani nuk kemi bërë kurrë transaksione me kompani shtetërore shqiptare, as nuk kemi bërë ndonjë tender, por e vetmja marrëdhënie me shtetin tonë është pagesa e taksave në mënyrë të rregullt.

Sokol Balla: Ju vet keni qenë zv.ministër i Ekonomisë, kur PD-ja tha se do ta mbyllte aktivitetin, e që më pas u rinegociua marrëveshja me Petroliferën.

Gjergj Bojaxhi: Kjo është dhënë me koncesion kur unë kam qenë duke punuar në Kombet e Bashkuara në Nju Jork. Kur unë kam ardhur këtu, qeveria Berisha bëri një premtim se do të anulonte disa nga këto projekte, por çështja shkoi në Arbitrazh dhe Avokatura e Shtetit e ndoqi çështjen, duke mos pasur lidhje me ministrinë, ndërsa në prill të 2007-s, pasi Arbitrazhi u humb nga shteti shqiptar, u vazhdua kjo kontratë. Gjatë kësaj kohe unë s’kam qenë pjesë e qeverisë së Shqipërisë. Është njësoj sikur t’i thuash dikujt që ka punuar në Dogana apo Tatime, që të mos punojë në asnjë biznes tjetër, sepse ka konflikt interesi me këto institucione. Kur shteti shqiptar vendosi ta vazhdonte bashkëpunimin me këtë kompani, unë s’kam qenë pjesë e qeverisë dhe nuk kam pasur gjë për të vepruar apo rinegociuar. Po të ishte te gjykatat shqiptare, ne mund të bënim përmirësime të kontratave koncesionare.

Sokol Balla: Për shkak të detyrës, ju jeni marrë me Petroliferën dhe e dini aktivitetin e saj, që i ndalon marrjen për tregti me pakicë të karburanteve. A mund të thuhet se ka një pikëpyetje mbi veprimtarinë e dy firmave që të kenë shfrytëzuar me zotësi vakuumet ligjore?

Gjergj Bojaxhi: Nëse kompania ime ka shkelur licencën, shteti shqiptar le ta çojë për hetim dhe gjykim. Kontrata e koncesionit është aty, nëse duan që kjo kompani të heqë dorë nga funksionaliteti i saj, atëherë le të vijnë dhe ne u kërkojmë aksionerëve dorëheqjen. Nuk ka asgjë të paligjshme që aksionerët e Everestit të jenë në këtë kompani. Shteti shqiptar ka pasur 4 vite kohë që ta shqyrtonte këtë çështje, megjithëse përpara disa vitesh Autoriteti i Konkurrencës e ka trajtuar këtë dhe është konkluduar që nuk ka asnjë shkelje të ligjit. Unë s’kam asnjë interes si administrator, që Superba të jetë aksionere, por nëse duan që të largohet, le ta bëjnë të ditur.

Sokol Balla: Nëse ju do të ishit sot në qeveri, do ta lejonit një funksionim të tillë?

Gjergj Bojaxhi: Nga informacioni që unë kam po, sepse nuk nuk ka asnjë konflikt interesi. Pavarësisht se këtu nuk flas dot si specialist, sepse nuk kam të gjitha informacionet e duhura për të interpretuar në themel gjithçka.

Sokol Balla: Prokuroria ka sugjeruar që të bëhet një hetim penal ndaj kompanisë. Ju pyeta nëse do të ishit funksionar i qeverisë, ju thatë se nuk ka asgjë anormale mes kompanive. Megjithatë, po të shikosh hetimin policor, bëhet fjalë për shifra të vogla dhe të mëdha. Ju krijoni një kompani me 10 mijë dollarë dhe ajo rezulton me 2 miliardë lekë të vjetra fitim pas 9 vitesh.

Gjergj Bojaxhi: Kompania është krijuar me 100 mijë dollarë kapital në fillim, ndërsa 9 mijë dollarë është ajo që kam investuar unë në atë kompani. Të gjitha procedurat kanë qenë transparente mbi funksionimin e kësaj kompanie. Së treti, kur ka filluar policia të hetojë mbi fitimin e një kompanie, si të ishte një shtet policor, ndërkohë që nuk ka parë se gjatë 3 muajve të parë të këtij viti ne kemi qenë me humbje. Nuk ka asnjë rast në historinë 25-vjeçare të Shqipërisë që pjesë e argumentit pse policia ka nisur këtë hetim është fitimi im.

Sokol Balla: Në fakt aksionet nuk është se i janë dhënë një personi që nuk ka fare informacion, por një prej biznesmenëve më të shquar në fushën e karburanteve. Pse kompania i shet aksionet kaq lirë?

Gjergj Bojaxhi: Të gjitha shitjet dhe transaksionet janë të hapura dhe të regjistruara në QKR, ndaj dhe të gjitha aksionet janë bërë mbi vlerën aktuale dhe parashikimet. Edhe në vitin 2015 që zotërinjtë kanë hetuar, ka pasur një rënie krahasuar me vitin 2014. Aksionet e një kompanie rriten e bien sipas ciklit të kompanisë. Sa i përket dividentëve, u janë paguar aksionerëve dhe janë paguar taksat. E vetmja gjë që ka mbetur është kapitali fillestar dhe parashikimi sesi do të jetë kompania në vitin e ardhshëm. E keqja këtu është se policia mbledh të dhënat për një proces rutinë të një kompanie, e cila vazhdon edhe sot e kësaj dite të bëjë të njëjtat transaksione. Këtu është e vështirë që një administrator kompania të tregojë punën e përditshme ndaj publikut, sepse është diçka shumë teknike.

Sokol Balla: T’i rikthehemi pak hetimit policor, që ka një pyetje: pse një kompani me 3-4 muaj punë ka qarkulluar një sasi të madhe parash, ndërkohë që kompanitë bashkëpronare, bashkëaksionere kanë asete shumë më të ulëta. Shuma të mëdha parash që kalojnë nëpër llogari bankare përbëjnë pikëpyetje për Policinë e Shtetit.

Gjergj Bojaxhi: Nuk kanë pse të shqetësohen, mjafton që të pyesin dhe ne u ofrojmë informacionin e duhur. Këtu po flasim për xhiron dhe jo për fitimet. Janë dy gjëra të ndryshme. Këto shuma nuk kanë të bëjnë me fitimin e kompanisë, sepse po t’i kisha kaq shumë lekë unë do të kisha bërë një tjetër jetë me standarde të tjera. Këto shuma i kanë të gjitha kompanitë që punojnë në sektorin e hidrokarbureve. Kompanitë e kësaj fushe jetojnë me fitimin që kanë nga puna e tyre dhe jo me xhirot.

Sokol Balla: Sa është fitimi i kompanisë suaj?

Gjergj Bojaxhi: Kemi pasur fillimisht një vit normal në 2012-n, pastaj patëm vitin 2013 të suksesshëm, ndërsa në dy vitet e fundit jemi thuajse katastrofë. Ku qëndron problemi këtu dhe çfarë ka të paligjshme? Nuk e kuptoj se çfarë duhet të bëjë një qytetar i këtij vendi që të zbatojë të gjitha ligjet, e ku sërish policia shkon e u thotë pse keni bërë kaq xhiro dhe kaq fitim. Janë të gjitha të regjistruara dhe të bëra publike.

Sokol Balla: Sipas policisë, thuhet që ju bëni shumë lëvizje shumash “cash” nga njëra bankë në tjetrën.

Gjergj Bojaxhi: Po, kompania ka llogari në disa banka të Shqipërisë dhe për t’i mbledhur në një llogari bazë, këto parà transferohen. Kjo gjë është bërë mes llogarive të një kompanie me të njëjtin NIPT, e bëhet për eficencë financiare për çdo transaksion. Shuma e xhiros që qarkullon në këtë fushë është e madhe dhe kostoja e tyre është shumë e madhe. Ndaj dhe po t’i mbledhësh, kostoja më e madhe në fund të vitit për kompaninë do të ishte ajo e lëvizjes së parave dhe jo e qirasë që paguhet në Vlorë. Të gjitha të dhënat janë sërish brenda sistemit bankar, ndaj dhe policia shqiptare duhej të kishte pasur interes dhe vullnet që informacionin ta mblidhte të plotë. Zotërinjve që e kanë bërë këtë hetim, u them se edhe nesër ne do të bëjmë të njëjtën gjë, të cilën ata thonë se e kemi të paligjshëm, por ata duhet të thellohen në hetime dhe të mos i bëjnë sipërfaqësore. Atyre mbase u duhet një specialist normal financiar, që do t’u tregonte se gjithçka do të ishte normale sipas ligjit.

Sokol Balla: Policia thotë se, nga zoti Bojaxhi janë depozituar “cash” miliona dollarë si administrator i kompanisë, jo si individ. Miliona të tjera janë hyrje, ndërsa totali i kreditimit është më i ulët. Ka një diferencë apo jo?

Gjergj Bojaxhi: T’iu sqaroj të gjithëve. Vlera e xhiros që ka kaluar përmes kësaj kompanie është edhe më e madhe sesa këta kanë thënë. Të gjitha blerjet dhe shitjet që janë bërë, bëhen me transaksione bankare, që regjistrohen dhe paguhen tatime për këto. Këtu zotërinjtë nuk kanë pse të marrin vlerat e xhiros, sepse nuk ka të bëjë me fitimin. Edhe kompanitë që i bëjnë marketing kompanive të telekomunikacionit në Shqipëri janë të vogla, por administrojnë parà të shumta. Kjo nuk do të thotë se janë parà të tyre, por thjesht menaxhojnë këtë sasi. Kompania jonë nuk blen anije nafte, nuk bëjmë çdoganime, por brenda magazinës së lirë. E blejmë si broker dhe e shesim me letra brenda portit të Vlorës. Për këtë arsye ne nuk kemi nevojë të kemi shumë punonjës, madje kurrë nuk kemi pasur 11 punonjës siç thotë hetimet e policisë, por deri në 5-6 njerëz. Kemi pasur mundësi që duke qenë të besueshëm te kompanitë shqiptare dhe duke qenë korrekt, kemi pasur mundësinë të ngrejmë biznesin. Kjo kompani po bën një punë shumë të mirë.

Sokol Balla: Dikush mund të thotë se keni pasur avantazh nga Petrolifera.

Gjergj Bojaxhi: Ne kemi pasur një bashkëpunim dhe paguajmë tarifat siç duhet. Asnjë avantazh nuk kemi prej tyre përveçse të na shërbejë siç duhet. Ka edhe konkurrentë të tjerë në fushën tonë të biznesit.

Sokol Balla: A mendoni se ky sulm mund t’iu ketë ardhur nga konkurrentët?

Gjergj Bojaxhi: Jo nuk besoj këtu, sepse sido që të vejë, puna e kompanisë do të vazhdojë siç ka vijuar deri më sot. Në fakt kam pasur një presion institucionesh shtetërore që pasi garova për kryebashkiak të Tiranës. Kemi komunikuar në mënyrë të vazhdueshme me doganat dhe tatimet e Shqipërisë, u japim informacion kur mendojmë se dikush ka shkelur ligjin dhe në shumicën e rasteve nuk kemi pasur reagime. Në vitin 2015 ose fundi i 2014-s kemi vënë re shkelje në sistemin e doganës dhe i kemi raportuar, ndërkohë që dogana ka reaguar duke i mbyllur vrimat financiare. Në rastet e tjera nuk kemi pasur reagime.

Sokol Balla: Bëhet fjalë për një kërkesë për një transfertë bankare që nuk është bërë në një kontratë mes jush dhe një kompanie në Gjeorgji, e themeluar në Ishujt Virxhin britanike. Njëri prej pronarëve është Igor Kalinich, i cili është i dënuar me burg nëse është rus, por nëse është ukrainas, është një i ekspozuar politikisht si puna juaj.

Gjergj Bojaxhi: Ne si kompani nuk merremi me pronarët e kompanive me të cilat bëjmë transaksione. Ne operojmë pa pasur interes për pronarët, por merremi me administratorët përfaqësues të tyre. Nëse bëjmë një blerje apo shitje me një kompani, ne pyesim shtetin shqiptar nëse u ka dhënë një NIPT që u mundëson këtyre kompanive të veprojnë në Shqipëri. Jemi interesuar dhe kjo kompani e ka një NIPT, ndaj dhe kemi vepruar me të. Sa i përket kompanisë “Everest”, nuk kemi asnjë pjesë të vendosur “offshore”, por njëra prej kompanive me të cilat kemi pasur lidhje. Ne kurrë nuk kemi bërë transaksione për të transferuar fonde nëpër banka “offshore”. Së pari, edhe nëse kjo kompani është regjistruar “offshore”, unë nuk e di nëse kjo është një gjë e mirë apo e keqe, por këtë hetim duhet ta bëjë policia. Ne kemi bërë transaksione me atë kompani përmes bankave të shteteve të BE-së, jo në Europë, ku ka standarde të larta mbikëqyrjeje. Nëse strukturat tona do të hetonin siç duhej, do të vinin re se të gjitha bankat e përfshira i kanë “mëmat” e tyre në BE. Unë mbaj mend administratorin me të cilin kam komunikuar, por nuk di nëse ai ka pasur probleme me shtetin prej nga vjen. Ne nuk merremi me investigimin e këtyre kompanive, por për sa kohë që shteti shqiptar i ka dhënë një NIPT kësaj kompanie, atëherë ne jemi të lirë të veprojmë me të.

Sokol Balla: Keni pasur probleme apo presione deri më tani, pas garës për Bashkinë e Tiranës?

Gjergj Bojaxhi: Ka pasur fjalë të tilla, por nuk jam i interesuar për asgjë. Unë jam një aktivist që dua të jap dhe të kontribuoj për të mirën e këtij shteti.

Sokol Balla: Ka një sërë akuzash të ngritura për kompanitë nën hetim, mes të cilave edhe juaja.

Gjergj Bojaxhi: Dakord kallëzim për pastrim parash, por ku është vepra penale këtu? Policia ka vendosur gjasme nën hetim disa prej aksionerëve, duke na futur bashkë në një thes për një çështje që nuk kemi lidhje. Bashkë me drejtuesit e ARMO-s. Unë si individ dhe “Everesti” nuk ka bërë kurrë asnjë transaksion të drejtpërdrejtë apo indirekt me ARMO-n. Nuk e di pse na fusin në të njëjtin thes. Nuk kemi hyrë kurrë në procese dhe marrëdhënie financare me kompani shtetërore, e as në tendera me shtetin shqiptar, pasi për çdo të tillë që do të bënim do të thonin është bërë “pazar”.

Sokol Balla: Ju thoni publikisht që kompania juaj nuk ka përfituar asnjëherë asgjë nga fondet publike?

Gjergj Bojaxhi:Absolutisht jo.

Sokol Balla: Sa e vërtetë mund të jetë fakti që për shkak të ekspozimit politik tuajin ta kenë ngrënë edhe këta të tjerët? Sa ka ndikuar përfshirja juaj politike, në përfshirjen edhe të këtyre të tjerëve në këtë hetim?

Gjergj Bojaxhi: Nuk e di, sepse as nuk kam informacion dhe as nuk më ka thirrur Prokuroria të jap sqarime. Nuk e kuptoj se pse policia kur ka bërë gjithë këtë hetim, të mos na pyeste që t’u jepnim informacione sqaruese për gjithçka. Unë e kam detyrim ligjor që nëse më thërret Prokuroria të shkoj e të jap llogari, sikurse edhe detyrim moral ndaj qytetarëve shqiptarë. Jam shumë krenarë që punën që kam bërë në administratën politike dhe për punën që po bëj tani. Kam qenë transparent gjithmonë, duke bërë deklarimet ndër vite për të ardhurat e mira. Nuk ka asnjë lloj mospërputhjeje mes asaj që kam deklaruar më parë dhe kësaj që po them tani. Si qytetar amerikan kam vepruar po njësoj, gjatë këtyre viteve kam paguar taksa si në Shqipëri edhe në SHBA, sikurse kam deklaruar të ardhurat e mia në të dyja vendet. Sipas ligjit amerikan, kam bërë deklarim edhe të të gjitha llogarive të kompanisë “Everest Oil”, me emrin e bankës, numrin e llogarisë dhe shumën maksimale që ka pasur gjatë vitit ajo llogari, sepse këtë e kërkon shteti amerikan. Ndaj e them se jam i hapur për gjithçka, ndërkohë që hetuesve tanë u them të kontaktojnë shtetin amerikan dhe të marrin të gjitha informacionet, meqë unë jam shtetas amerikan. Më transparent sesa jam dhe kam qenë unë, nuk e di të ketë tjetër. Jam ndierë gjithnjë krenar që kam ndjekur këtë rrugëtim dhe kam zbatuar ligjet gjithmonë. Sot unë jam këtu, ndërsa shumë të tjerë që bëjnë evazion dhe nuk paguajnë taksa ndoshta janë duke më parë dhe nënqeshur.

Sokol Balla: Për shkak se dhatë leksion sesi një person i njohur publik dhe politik, të futet dhe të japë informacion të plotë mbi këtë. Jeni ndër të parët që kur uleni në atë karrige keni dhënë të gjitha informacionet për transparencë, ndërsa të tjerët kur vijnë thjesht fshihen pas politikës.

Gjergj Bojaxhi: Doja të shtoja se edhe prona ime në Farkë është blerë në vitin 2002, kur unë isha ende në Amerikë dhe nuk jetoja në Shqipëri. Kemi blerë të njëjtën parcelë nga i njëjti fshatar me 3 shokë, për të cilën mua ma konsiderojnë si problematike, ndërsa ata dy të tjerët nuk kanë probleme. E sigurtë është njëri prej ata të dyve është ende në aktivitet politik, gjë që tregon se policia po vepron me dy standarde. Nëse ajo pronë ka pasur një vlerë të ulët, është vendosur garanci në bankë për të investuar në atë pronë dhe banka tashmë e ka vlerësuar me një çmim më të lartë. Policia sërish e quan si një deklarim të padrejtë mbi vlerën e atij trualli. Tani ose janë dashakeqas, ose janë totalisht jokompetentë. Unë do të ofroja edhe diçka më shumë, që uroj ta përdorni për t’i vendosur të tjerët përballë. Unë ofroj veten time që jo vetëm për kompaninë që unë administroj, por edhe për të gjitha institucionet shtetërore që unë kam punuar apo drejtuar, të merrni një kompani specialiste të testit të poligrafit, dhe të pyetem drejtpërdrejt për çdo gjë.

Sokol Balla: Si qytetar i angazhuar, ju kemi parë kohët e fundit shumë aktiv. Avokati i djallit do të thoshte që jeni bërë aktiv sepse po hetoheni?

Gjergj Bojaxhi: Nuk është aspak e tillë. Kam qenë dhe jam shumë i angazhuar. Pas garës së Tiranës na është dashur që të mblidhemi një grup qytetarësh për të menduar sesi do ta vazhdojmë angazhimin tonë. Në këtë rast kemi nisur me arrogancën e kryeministrit që u tha aktivistëve se duhej të shkonin të mblidhnin vota e pastaj të flisnin për stadiumin. Nëse nuk do të bësh politikë, zëri i tyre nuk quhet, sipas kryeministrit. Në fakt flasim jo vetëm për një stadium, por për një fushë sportive me një qendër tregtare.

Sokol Balla: Ju doni të prishnit një mbledhje të KKT-së…

Gjergj Bojaxhi: Ne kemi qenë aty persona të njohur publik dhe donim të diskutonim e të kundërshtonim lirisht atë plan. E di që nëse do të kishte qenë Sali Berisha kryetar i KKRRT-të, nuk do të kishte guxuar dikush, por ne shkuam një pjesë e shoqërisë civile. Një pjesë e tyre nuk u lejua, edhe pse ishin të kryesuar nga zoti Rakipi. Pyetja që ngrihej ishte se kujt do t’ia bënte prezantimin, ministrave të tij? Ne po kthehemi në një vend ku kryeministri po bëhet si një sulltan, edhe më keq madje. Sepse kur duhet të bëhet një objekt publik, bëhet thirrje e shoqërisë civile për të pasur një juri mbi atë vendim. Sot kryeministrin e kemi njëkohësisht gjykatës, jurist dhe gjithçka tjetër, duke zëvendësuar të gjitha institucionet e vendit. Fakti që ne do të bëjmë një objekt aq të rëndësishëm në qendër të Tiranës pa juri, lë për të dëshiruar. Rama nuk është zgjedhur për të vlerësuar vlerat e atij projekti, nëse duhet bërë aty, çfarë vlere do të ketë dhe si do të ndikojë në pjesën tjetër të qytetit. Ai mendon se transparenca është duke dalë e duke folur në televizor, ndërkohë që në realitet transparenca është kur dëgjohen grupet e interesit. Ishte e turpshme në atë prezantim, që kryetari i Shoqatës së Arkitektëve të shkojë atje dhe papritur të ndryshojë mendim. Në një kohë që anëtarët e shoqatës nuk janë dakord që ai stadium të bëhet aty. Të gjithë do të donim që Shqipëria dhe Tirana të kishte një stadium me standarde europiane, në një qytet me standarde të tilla. Nëse ne vendosim atë objekt në atë pjesë të qytetit, ne do të shkelnim të gjitha standardet, edhe ato që Tirana ka pasur deri më sot.

Sokol Balla: Jeni sulmuar edhe para kandidimit dhe pas kandidimit për kryetar bashkie nga PD-ja. Hetimi që ka nisur ndaj jush ka nisur nga policia dhe, e thënë popullorçe, vjen nga qeveria e sotme e majtë. Mendoni se ky sulm ka prapavijë politike?

Gjergj Bojaxhi: Jam tërësisht i bindur për këtë. Por ne jemi të vendosur t’i ofrojmë shoqërisë një alternativë tjetër, jo për pazar politik, por sepse kjo klasë politike ka për qëllim që, kur dikush futet në politikë për të prishur ingranazhet e tyre të përbashkëta, atëherë e sulmojnë atë individ. Ne kemi modeluar dhe konceptuar diçka që qartazi një individ të mos kthehet në pushtetar absolut ndaj një partie, siç është kjo klasë e sotme politike. Ne përfaqësojmë atë pjesë të shoqërisë që kërkon të gjejë një zgjidhje për të dalë nga ky batak politik që na ka zaptuar prej shumë dekadash.

Sokol Balla: Dikush mund të thotë se, kush jeni ju që merrni vetëm 10 mijë vota nga 300 mijë votues në Tiranë.

Gjergj Bojaxhi: Fakti që me qindra e mijëra shqiptarë aplikojnë në lotarinë amerikane dhe po shumë të tillë kërkojnë të largohen nga vendi, tregon qartazi se ky vend nuk po ecën përpara në drejtimin e duhur për mirëqenie, sipas këndvështrimit tim. Sa i përket kandidimit, thjesht qëlloi që ne të mos ishim të përshtatshmit për të pasur besueshmërinë e qytetarëve të Tiranës, por kemi shumë për të bërë për të fituar zemrat e atyre qytetarëve që duan një klasë politike më të drejtë. Ne nuk po fryhemi dhe nuk pretendojmë të jemi shumicë, por që ata qytetarë që mendojnë si ne të bashkohen dhe të bëjnë zërin e tyre të dëgjohet.

Sokol Balla: Projekti juaj politik vazhdon edhe për vitin 2017, me një parti të re politike?

Gjergj Bojaxhi: Besoj se po, unë do të vazhdoj me këtë gjë, por nuk dua të bëhem kryetar partie. Dua të ndërtojmë një model të ri dhe marrëdhënie të reja, pasi përndryshe nuk kemi çfarë modeli të ri t’i japim shoqërisë. Pavarësisht sesi është bërë ky vend dhe si kanë shkuar gjërat, kjo klasë politike ka bërë që ne të humbasim besimin te njëri-tjetri dhe nëse nuk dalim nga ky ngërç, nuk besoj se do të mund të krijojmë një shoqëri demokratike dhe të shumëkujt. Ju jap fjalën juve dhe të gjithë qytetarëve që nuk do të jem kryetar partie, por pjesë kontribuese për një shoqëri të hapur. Emri i kësaj partie politike nuk dihet ende, pritet të dalë në vijim pasi të mblidhemi dhe ta diskutojmë. Tashmë jemi duke hartuar vetëm thelbin dhe parimet mbi të cilat do të ngrihet.

Top Channel