Kosova

Kosova, javën e ardhshme në UEFA

29/04/2016 14:00

Të martën e ardhshme, Federata e Futbollit të Kosovës do të jetë anëtare e UEFA-s. Kjo është ajo që publikohet në media të ndryshme serbe, sipas të cilave, qeveria e futbollit evropian ka vendosur të ndryshojë statutin e saj në Kongresin që do të mbajë në Budapest, për të favorizuar anëtarësimin e Kosovës, gjë të cilën ato e cilësojnë një skandal.

Statuti i UEFA-s parashikon që federata e një vendi bëhet anëtare e saj nëse ai shtet njihet nga të gjithë vendet anëtare të Kombeve të Bashkuara. Media serbe thekson se UEFA do të bëjë një propozim për të zëvendësuar këtë frazë me “njohjen e shtetit nga pjesa më e madhe e shteteve në Evropë”.

Kosova tashmë njihet nga pjesa më e madhe e shteteve të Evropës, gjë që i hap rrugën drejt UEFA-s për t’u bërë anëtarja e 55 e saj. Në të njëjtën kohë ajo do të ketë mundësinë të marrë pjesë edhe në kualifikueset e Botërorit “Rusi 2018” në një grup me Kroacinë, Turqinë, Islandën, Finlandën dhe Ukrainën.

Ndërkaq, mësohet se një delegacion i Federatës Serbe të Futbollit ndodhet në Nion të Zvicrës për të fituar mbështetjen e presidentit të UEFA-s, Teodor Teodorakis, në tentativën për të penguar hyrjen e Kosovës në këtë organizatë. Në të njëtjën kohë mendohet se Federata Serbe e Futbollit do të përdorë të njëjtën strategji si në rastin e pengimit të anëtarësimit të Kosovës në UNESCO.

Top Channel