Siri, sulmet ndaj spitaleve “krime lufte”

Të paktën 50 persona mbetën të vrarë në sulmet ajrore ndaj spitaleve dhe shkollave në rajon, deklaruan Kombet e Bashkuara.

Ministria e Jashtme turke fajësoi Rusinë për sulmet, ndërkohë që presidenti sirian Bashar al Assad ka hedhur dyshime mbi mundësinë e implementimit të planit për “dhënien fund të akteve armiqësore” në Siri.

Javën e kaluar fuqitë botërore ranë dakord që të punonin për vendosjen e një armëpushimi në Siri, që do të hynte në fuqi më vonë gjatë kësaj jave.

Por në komentet e tij të para, Assad deklaroi se armëpushim nuk do të thotë që të gjitha palët të ulin armët.

“Deri tani ata kanë thënë se duan arritjen e një armëpushimi brenda javës, por kush është aq i aftë sa të zgjidhë tërë këto probleme në një javë?”, u shpreh Assad.

Ndërkohë, Mego Terzian, president i organizatës Mjekët pa Kufij, tha për agjencinë e lajmeve “Reuters” se, “ose qeveria siriane, ose ajo ruse janë fajtore për sulmet”.

Por ambasadori sirian në Moskë u përgjigj duke thënë se, ato që duhen fajësuar janë Shtetet e Bashkuara, një deklaratë që Pentagoni e hodhi poshtë duke e cilësuar “tërësisht falso”.

“Ne s’kemi asnjë arsye pse të sulmojmë në Idlib, pasi ISIS nuk është aktiv atje”, deklaroi zëdhënësi i Pentagonit, kapiten Jeff Davis.

Top Channel