Dhunuan numëruesin e votave, burg për Fatmir Kajollin dhe djalin e tij

Sipas hetimit të Prokurorisë së Fierit rezulton se, në atë datë, rreth orës 01.15, në Komisionin Zonal të Administrimit të Zgjedhjeve (KZAZ) me nr .57, e cila ndodhej në shkollën “Janaq Kilica”, në lagjen “Kastriot”, Fier, shtetasi Roland Bylyshi, me detyrën e numëruesit për zgjedhjet e Këshillit Bashkiak të Bashkisë Fier, në momentin që po dorëzonte procesverbalin e numërimit të votave brenda KZAZ, është goditur me grusht dhe me tub hekuri deri sa ka humbur ndjenjat nga shtetasi Fatmir Kajolli, në bashkëpunim  me djalin e tij, Florim Kajolli.

Shtetasi Roland Bylyshi ka humbur ndjenjat dhe është dërguar në spitalin e Fierit për ndihmë mjekësore. Menjëherë pas kësaj ngjarjeje, ai ka bërë kallëzim penal.

Autorët e kësaj ngjarjeje, Fatmir Kajolli dhe Florim Kajolli, pasi kanë goditur derisa ka humbur ndjenjat Roland Bylyshin, kanë shkatërruar me dashje sistemin e monitorimit të procesit zgjedhor, duke rrëzuar në dysheme 7 televizorë LG dhe shtyllat mbajtëse, si edhe  kamerën vëzhguese.

Gjatë kqyrjes, kamera vëzhguese lëshonte sinjal alarmi dhe kishte dalë jashtë pune. Po kështu, televizoret LG u gjetën të rrëzuar përtoke dhe të fikur. Procesi i numërimit të votave është ndërprerë. Pasi kanë shkatërruar sistemin e monitorimit me dashje, Fatmir dhe Florim Kajolli janë larguar nga KZAZ dhe kanë goditur rojen, Rufat Cuku, që ndodhej tek porta hyrëse e KZAZ, duke i shkaktuar dëmtime në krah dhe këmbë.

Veprimet e tyre ndaj këtij punonjësi policie i kanë kryer për shkak se ka mbyllur derën për të mos i lejuar të largohen. Pasi e kanë goditur punonjësin e policisë  kanë arritur të largohen dhe të fshihen pas kësaj ngjarjeje.

Fillimisht, gjatë fazës së hetimeve, ndaj të pandehurve, Gjykata e Fierit vendosi masën e sigurisë “arrest me burg” në mungesë, e cila u zbut në vijim nga ana e Gjykatës së Apelit Vlorë, pavarësisht faktit se masa e dhënë nga Gjykata e Shkallës së Parë nuk ishte ekzekutuar ende.

Ndaj shtetasit Kajolli është bërë edhe sekuestrimi i të gjithë pronave të tij, sipërfaqe të mëdha toke dhe ndërtime për shkak të aplikimit të ligjit antimafie. Shtetasi Kajolli është arrestuar një herë për llogari të drejtësisë italiane, pasi figuronte i dënuar në Itali. Por gjykatat shqiptare e kanë liruar, duke mos lejuar ekstradimin. Fatmir Kajolli, ish-këshilltar bashkiak për Partinë Republikane në Fier, gjatë kohës që ishte në kërkim, arriti të marrë me familjarët e tij koncesionin e parkimeve në qytetin e Fierit. Sipas drejtësisë italiane, ai është dënuar me 40 vite burgim, 24 nga të cilat nga Gjykata e Milanos për “krijim organizate kriminale” dhe “posedim dhe tregtim të lëndëve narkotike”.

Po ashtu, në vitin 2000 edhe Gjykata e Romës e dënoi atë me 16 vite burgim me të njëjtën akuzë. Pas këtyre vendimeve, ai u shpall në kërkim ndërkombëtar dhe ka mundur të jetojë e zhvillojë biznes i qetë në Fier, derisa u dënua në Shqipëri me 1 vit e 4 muaj burg për rrahjen e një komisioneri.

Ndërkohë, është ende pezull në dosjet e Ministrisë së Drejtësisë dhe gjykatave shqiptare fakti që shtetasi Kajolli ka një dënim prej 40 vitesh me burgim në Itali, të cilin nuk e ka kryer.

Top Channel