Laçi dhe Flamurtari kanë arritur të marrin fitoren e parë në kategorinë Superiore, duke mposhtur përkatësisht Bylisin dhe Vllazninë.
Laçianët mposhtën 3-1 Bylisin në një sfidë që deri 10 minuta para përfundimit të kohës së rregullt ishte mbërthyer në shifrat 1-1. Për skuadrën ballshiote kjo ishte humbje e tretë në këtë fillim sezoni, që e mban në vend të parafundit të tabelës me vetëm një pikë, të fituar ndaj Tiranës në “Qemal Stafa”.
Ndërkohë, Flamurtari e vulosi ndeshjen ndaj Vllaznisë që në 45 minutat e pjesës së parë, duke shënuar dy gola me Grecën dhe Chadadze. Në 45 minutat e dyta, pavarësisht rasteve për shënim nga të dyja ekipet rezultati i pjesës së parë mbeti i pandryshuar, 2-0.
Me këtë fitore vlonjatët ngjiten në kuotën e 4 pikëve pas 4 ndeshjeve, ndërsa Vllaznia ende nuk e ka shijuar pikën e parë për këtë sezon.
Ditën e hënë do të luhet edhe ndeshje kryesore e kësaj jave, Skënderbeu-Tirana në orën 20:00.
Top Channel
