35 mijë banorë të qytetit të Cërrikut prej dekadash kanë mungesa të
theksuara në furnizimin me ujë të pijshëm. Për këtë arsye në vitin 2005
nisi investimi për ndërtimin e një ujësjellësi të ri.
Pas përfundimit të dy fazave të para ku u përdorën 91 milionë lekë nga buxheti i shtetit sërish banorët e Cërrikut s’kanë ujë sepse qeveria nuk miratoi më fonde për fazen e tretë përfundimtare.
Bashkia e Cërrikut e ka të pamundur të financojë e vetme fazën përfundimtare të projektit e cila kap vlerën e 98 milionë lekëve.
“Ngelet pa investuar faza e tretë, e cila përkon me lagjen numër tre, një lagje që ka një numër banorësh afërsisht gjysmën e numrit të banorëve të Cërrikut”, thotë kreu i Bashkisë Cërrit, Servet Duzha.
Po në vitin 2005 nisi rikonstruksioni i rrugës “Rinia” në qytetin e Cërrikut. Ndërprerja e fondeve bëri që edhe ky investim të mbesë në mes dhe që atëherë rruga është shkatërruar plotësisht.
I njëjti problem paraqitet edhe në qytetin e Belshit. Në vitin 2012 me një financim prej 55 milionë lekë nisi rikonstruksioni i qendrës së qytetit dhe rrugëve kryesore. Këtu puna ndali që në fazën e parë dhe ndërkohë që priten financime të tjera gjendja shkon drejt degradimit.
Për fazën e dytë të këtij projekti nevojiten rreth 70 milionë lekë dhe Bashkia e Belshit shprehet se me fondet e saj nuk mund të marrë përsipër një investim të tillë.
“Ne kemi kërkuar çdo vit që të vazhdojë financimi i fazës së dytë të këtij projekti edhe sepse përmbush kërkesat e qeverisë për rregullimin e qyteteve”, thotë kryetari i Bashkisë së Belshit, Asqeri Kuqa.
Bashkia e Librazhdit ndihet e paralizuar në tre projekte të saj të lëna tashmë përgjysmë. Më emergjenti ndër ta paraqitet rehabilitimi i shtratit të Përroit She i cili kalon përmes qyteti dhe argjinatura e lumit Shkumbin në zonën industriale të cilat gjatë vjeshtës shkaktoi përmbytje.
“Bashkia e Librazhdit ka disa projekte që presin fondet. Disa projekte janë lënë përgjysmë për arsye financimi”, thotë kreu i Bashkisë së Librazhdit, Shefki Çota.
Vetëm në Qarkun e Elbasanit llogariten qindra milionë lekë të shkuara dëm nga projekte të nisura dhe të lëna përgjysmë. Një shumë ndoshta dyfish më e madhe se kaq do të duhet për t’i rinisur nga fillimi këto punime. Ndërprerja e fondeve nga qeveritë duket se janë pasojë e gjendjes financare të buxhetit të shtetit ndër vite.
Top Channel
