Papa: Mjaft me biznesin e luftës

“Lufta është një cmenduri. Lufta shkatërron edhe atë që është krijesa më e bukur e Zotit: qënia njerëzore. Lufta shkatërron gjithcka, edhe lidhjen vllazërore. Lufta është një marrëzi, plani i saj i zhvillimit është shkatërrimi: të duash të zhvillohesh përmes shkatërrimit”, ka thënë Papa.

Në meshën e mbajtur në lokalitetin Redipulia, ati i shenjtë ka drejtuar gishtin ndaj atyre që i quan “planifikues të terrorit, organizatorë të konflikteve, si dhe biznesmenët e armatimeve”, që sipas tij kanë të shkruar në zemër: “c’më duhet mua?”.

“Sot regjistrohen shumë viktima. Si është e mundur kjo? Është e mundur sepse edhe sot, prapa skenave ekzistojnë interesa, plane gjeopolitike, etje për para dhe pushtet dhe industria e armëve, që duket se është kaq e rëndësishme”, ka thënë Papa.

“Duke thënë ‘c’më duhet mua?’, biznesmenët e luftës ndoshta fitojnë shumë para, por zemra e tyre e korruptuar ka humbur aftësinë e të qarit”, ka shtuar ati i shenjtë.

Duke folur në pozitën e djalit, vëllait dhe babait, Papa u ka kërkuar të gjithëve që të konvertojnë zemrën e tyre, nga shpërfillja për jetën e njeriut tek loti.

“Për të gjithë të rënët në masakra të kota, për të gjitha viktimat e cmendurisë së luftës, në cdo kohë. Njerëzimi ka nevojë të qajë dhe kjo është ora e lotit”, është shprehur ati i shenjtë.

Top Channel