Ukraina ofron autonomi per rebelet
10/09/2014 00:00
Rrëmbimi masiv në shkollën katolike, lirohen 130 nxënës të tjerë në Nigeri 21/12 21:41
Presidenti ukrainas ka deklaruar se do të ofrojë më shumë autonomi për separatistët në lindje, në mënyrë që ta mbajë vendin të bashkuar.
Petro Poroshenko tha se armëpushimi aktual e ka ndryshuar rrënjësisht situatën, pavarësisht raportimeve se rebelët kanë marrë nën kontroll një tjetër qytet.
Por një lider i rebelëve në Donetsk i hodhi poshtë këto deklarata dhe tha se, banorët e këtij qyteti kanë ndërmend të shkëputen dhe të jetojnë të pavarur.
Armëpushimi mes palëve hyri në fuqi të premten e kaluar, përmes një marrëveshje të nënshkruar në Minsk të Biellorusisë, mes palës ukrainase dhe përfaqësuesve të separatistëve.
Poroshenko dhe homologu rus Putin zhvilluan një tjetër bisedë telefonike të martën dhe u shprehën të kënaqur me mënyrën se si po ecën armëpushimi, konfirmoi një zëdhënës i Kremlinit.
Në një mbledhje të kabinetit të tij, të transmetuar direkt në televizion, lideri ukrainas tha se implementimi i armëpushimit ka qenë i vështirë mes luftës për pavarësi dhe ruajtjes së integritetit të vendit.
“Por kjo situatë ka ndryshuar rrënjësisht. Përpara se të njoftohej armëpushimi, Ukraina po humbiste jetët e dhjetëra heronjve të saj çdo ditë”, tha Poroshenko.
Sipas tij, të dhënat e fundit të mbledhura nga shërbimet e inteligjencës tregojnë se 70 për qind e trupave ruse janë tërhequr mbrapsht përtej kufirit.
Presidenti shtoi se po kërkon një zgjidhje të përhershme të konfliktit dhe i ka dërguar Parlamentit një projekt/ligj që u jep separatistëve më shumë autonomi, por që i mban rajonet e tyre në Ukrainë.
Por Andrei Purgin, numri dy i qeverisë së Republikës së vetëshpallur të Donetskut, u përgjigj duke thënë se rebelët nuk kanë ndërmend të mbeten pjesë e Ukrainës.
Top Channel
