Rreziku që vjen nga Bitcoin

Alarmi për monedhën virtuale që përdoret për transaksione online është dhënë nga prokurori i përgjithshëm i Romës, Luigi Ciampoli, i cili nënvizon rrezikun që Bitcoin të shërbejë si instrument për qarkullimin e të ardhurave ilegale.

Prokurori sugjeron ndërhyrje normative që të japin siguri për gjurmimin dhe transparencë për identifikimin e të gjithë personave të përfshirë në operacionet e transferimit të Bitcoin.

“Shqetësimin tim e kam ngritur prej kohësh. Kam sinjalizuar rreziqet që vijnë nga Bitcoin, të cilat vazhdojnë të jenë të pranishme. Sistemi sigurisht është joshës për nga lehtësia e këmbimit dhe thjeshtësia e operacioneve financiare online. Por për mendimin tim është pikërisht përhapja e menjëhershme e fenomenit që ngre dyshime”, ka thënë Ciampoli.

Fenomeni Bitcoin, kujton zyrtari i lartë, lindi rreth vitit 2008, paralelisht me shfaqjen e krizës ekonomike që ka përfshirë shumë vende dhe me objektivin për të propozuar një sistem ekonomiko-financiar alternativ ndaj bankave.

“Pra, nëse kjo presupozon një konflikt me bankat, sidoqoftë i dobishëm sa i takon profilit të konkurrencës, gjithçka ndodh duke mohuar transparencën dhe qartësinë e identifikimit dhe referimit”, shton Ciampoli.

Ai thekson më tej se, dispozitat e sigurisë që parashikohen në rastin e transferimit të Bitcoin nuk ofrojnë të njëjtat garanci që imponohen nga institucionet ndërkombëtare bankare.

Top Channel