Tiranë, polici shpëton gjyqtaren
26/06/2014 00:00
Tentuan të korruptojnë policinë për të shmangur ndëshkimin, në pranga dy shtetas 15/09 11:27
Ndërhyrja e një polici ka shpëtuar jetën apo plagosjen e gjyqtares civiliste të Gjykatës së Tiranës, Vjosa Zaimi, të cilën kanë tentuar ta sulmojnë me armë të ftohtë.
Ngjarja ka lidhje me çështjen gjyqësore ndaj shtetases Rabie Berhani, e cila ka depozituar kërkesën për vazhdim të urdhërit të mbrojtjes ndaj saj dhe fëmijëve për t’i shpëtuar dhunës së Qamil Cerpjas.
Gjatë zhvillimit të seancës, njëri nga fëmijët e çiftit ka nxjerrë thikën nga çanta personale duke ia drejtuar gjyqtares Zaimi, e cila është shtatëzënë.
Menjëherë ka ndërhyrë polici i qendrës së grave të dhunuara në Kamëz, i cili ndiqte procesin, duke ndaluar personin.
Pas këtij incidenti Gjykata e Tiranës deklaroi për mediat se do t’i kërkojë sërish komisariatit numër 2 të kryeqytetit, i cili mbulon zonën ku ndodhet gjykata civile, si dhe Drejtorisë së Policisë së qarkut Tiranë, që të rrisin nivelin e sigurisë dhe efikasitetin e kontrolleve të qytetarëve në ambjentet e gjykatës.
“Kjo, me qëllim ruajtjen e rendit dhe sigurinë fizike të qytetarëve, gjyqtarëve dhe gjithë punonjësve të administratës gjyqësore”, thuhet në një komunikatë për shtyp.
Top Channel
