Padia ndaj Dasho Alikos

Didi tha se, policia ka prova për të kryer këtë proçedim pa bërë publik ndonjë konkrete prej tyre dhe se është në dorën e prokurorisë dhe gjykatës për të vlerësuar masën e sigurisë për Dashamir Alikon.

“Prova e gjallë është Lazarati ku ende po gjejmë kanabis dhe armë. Masa e sigurisë i takon prokurorisë që duhet ta kërkojë dhe gjykatës që duhet ta vendosë. Ne kemi punuar në terren, ndërsa prokurorët po kryejnë veprimet proçeduriale. Personi në fjalë duhet të përgjigjet”, deklaroi Didi.

Kreu i policisë tha se vazhdojnë kërkimet për gjetjen e grupit kriminal që qëlloi me armë policinë në tre ditët e para të aksionit në Lazarat. Deklaratën ai e bëri pas pas përfundimit të një konference për policinë dhe komunitetin, ku u shpreh se baza e punës së strukturave që ai drejton do të jetë kjo filozofi.

“Nuk është se ne ecim në rrugë të pashkelura dhe praktika të panjohura, policia në komunitet ka qenë gjithmonë objektivi ynë. Me fokusin për të vendosur një partneritet polici-publik, ku komunitetet bashkëpunojnë në mënyrë aktive për zbardhjen e ngjarjeve. Ky bashkëpunim është baza e misionit policor”, theksoi Didi.

Dashamir Aliko, kreu i komunës Lazarat, u kallëzua penalisht nga Policia e Shtetit një ditë më parë në Prokurorinë e Krimeve të Rënda, për një sërë veprash penale, mes të cilave edhe ajo e vrasjes së mbetur në tentativë për shkak të cilësive të veçanta dhe drejtimit të organizatave kriminale.

Top Channel