Lazarat, kapen 12.8 ton hashash

Policia po avancon me kujdes shtëpi më shtëpi duke shmangur pasojat e përplasjes me armë. Të shtënat nga Lazarati janë sporadike, ndërsa vazhdon asgjesimi i drogës nga vetë banorët.

Policia ka ngushtuar ndjeshëm rrethimin edhe nga ana e Sopotit, ndërkohë që në total janë arrestuar 13 persona, 5 të fundit janë shtetasit Rustem Xhemal Mahmutaj, 19 vjeç, Teslim Xhemal Mahmutaj, 22 vjeç,Vandam Razip Mahmutaj, 19 vjeç dhe Hysen (Neni) Çela, 48 vjeç.

Këta shtetas akuzohen për veprat penale vrasje e punonjësve të policisë e mbetur në tentativë e kryer në bashkëpunim, mbajtje pa leje e armëve dhe municionit luftarak, kultivimi i bimëve narkotike. Të arrestuarit dyshohen se së bashku me persona të tjerë kanë qëlluar me armë në drejtim të forcave të policisë gjatë operacionit të ndërmarrë nga forcat e policisë në fshatin Lazarat.

Gjatë kontrollit të ushtruar në banesën e shtetasit Vandam Mahmutaj janë gjetur e sekuestruar në cilësinë e provës materiale 1363 kg hashash, 8500 rrënjë bimë narkotike, 1 mijë fishekë model 56, 225 gëzhoja model 56, 1 granatë dhe një armë pistoletë shenjëdhënëse, si dhe një sasi e konsiderueshme fishekësh të llojeve të ndryshme.

Kontrolli është ushtruar në 80 banesa deri më tani dhe në total janë arrestuar 13 persona. Sot, policia po vijon me depërtimin më në thellësi të fshatit dhe me kontrollin në territore dhe tokat e komunës. 800 forca shoqërohen nga 60 automjete dhe një nga synimet e tyre është edhe neutralizimi dhe kapja e personave të armatosur që po qëllojnë ndaj policisë.

Policia arrin shtëpinë nga gjuhej me mitroloz

Policia në Lazarat ka avancuar më në brendësi të fshatit, duke arritur edhe në pozicionet e personave të cilët qëllonin ndaj uniformave blu me armë të rënda.

Lajmin e ka bërë të ditur ministri i Brendshëm Saimir Tahiri, përmes një njoftimi në rrjetin social Facebook.

“Vazhdon progresi. Policia tani gjendet në shtëpinë prej nga gjuante mitrolozi i rëndë. Unë jam me Policië e Shtetit! Bravo çuna, bravo!”, shkruan Tahiri në profilin e tij.

Ndërsa në një njoftim më të hershëm po në rrjetin social, ministri bëri të ditur se, forcat e Policisë së Shtetit po vijojnë me depërtimin hap pas hapi për në brendësi të fshatit Lazarat, duke ushtruar kontroll në territoret e banesave, tokave përreth tyre dhe në tokat e komunës.

Sipas Tahirit, gjatë veprimeve në terren forcat policore janë të pajisura me mjete të posaçme për veprime kundër bandave të armatosura dhe armatim të rëndë për t’iu përgjigjur reagimit me armë të grupeve kriminale.

Për transportin e forcave dhe të pajisjeve policore janë përdorur dhe helikopterët. Në kuadër të kontrolleve, nga policia janë gjetur e asgjesuar mbi 287 kg marijuanë, si dhe sasi armatimi e municioni. 

Top Channel