Beteja për Lazaratin

Aksioni i policisë është duke u zhvilluar hap pas hapi duke marrë nën kontroll njëra pas tjetrës shtëpi të braktisura tek të cilat janë gjetur sasi të tjera të konsiderueshme lëndësh narkotike.

Për çdo shtëpi ka një grup policor që bën inventarizimin, mbahet një protokoll dhe evidentohen provat. Në njërën nga shtëpitë e Gate Mahmutaj, të arrestuar një ditë më parë nga policia si kryetar i grupit të armatosur që ka qëlluar ndaj forcave të rendit, grupi policor ka debatuar me të motrën e tij.

Gjatë paradites forcat RENEA janë ballafaquar me një grup prej 12 personash të cilët ishin vendosur brenda shtëpisë së Hysen Çelës, nga ku është goditur edhe me snajper. Por më pas Çela, i cili ishte kreu i këtij grupi është arrestuara nga policia rreth mesditës. Por goditjet me armë ndaj policisë sërish kanë vijuar.

Sipas banorëve në fshat janë edhe dy furgonë me të cilët lëvizin të rinj e adoleshentë të armatosur tërësisht jashtë kontrollit.

Kreu i Komunes Dasho Aliko paraditen e së mërkurës bëri thirrje që ata të dorëzohen dhe armët të mblidhen në qendër të fshatit.

Në një intervistë për Top Channel Drejtori i Përgjithshëm i Policisë së Shtetit, Artan Didi tha se nuk mund të jepen me saktësi se deri në cilët kufij të fshatit ka hyrë policia, por veprimet më së shumti janë taktike për t’i dhënë kohë reflektimi personave të armatosur të ndalojnë sulmin dhe të dorëzohen.

“Me kufij të saktë nuk jam në gjendje që të jap një vijë të qartë të kapjes së terrenit nga forcat e policisë. Por mund të them që kemi pozicione të favorshme. Jemi duke kryer më tepër veprime të karakterit taktik dhe demonstrativ me qëllim që cdo personi të armatosur t’i japim kohën e nevojshme për të reflektuar dhe cdo individi që kundërshton forcat e policisë për të ndaluar kundërshtimin dhe për t’u vendosur përballë drejtësisë”, deklaroi Drejtori i Përgjithshëm i Policisë, Artan Didi.

Gjatë paradites policia ka mundur të arrestojë edhe tre  adoleshentë nga Lazarati të cilët  kishin goditur me gurë makina të policisë së ndaluar përpara Komisariatit në Gjirokastër.

Ndërkohë banorë të pakënaqur me arrestimet kanë patur përplasje verbale edhe me drejtues të lartë të policisë.

Gjatë aksionit të së mërkurës është zbuluar në Lazarat edhe një tjetër laborator ku policia dyshon se përpunohej një tjetër lloj droge përpos hashashit.

Deri tani sipas të dhënave zyrtare të policisë është asgjësuar një sasi droge që vlen nga 30 deri në 37 milionë euro, janë djegur 11,3 ton hashash dhe janë shkatërruar mbi 70 mijë rrënjë. 

Gjatë ditës… 

Policia ka asgjesuar deri më tani një sasi droge që vlen nga 30 deri në
37 milionë euro, sasia e drogës së djegur është 11 ton e 300 kilogramë,
ndërsa janë gjetur dhe shkatërruar 70 mijë rrënjë.

Kjo sasi është gjetur gjatë kontrollit të 30 banesave në zonën e lagjes Mahmutaj. Në lagjen që policia ende nuk ka hyrë është djegur një sasi akoma më e madhe droge në një përpjekje për të fshehur provat.

Ndërkohë, në jug të fshatit janë duke avancuar ngadalë shtëpi më shtëpi forcat RENEA të mbështetura nga mjete të blinduara.

Policia njoftoi se është identifikuar një grup prej 12 personash të drejtuar nga shtetasi Altin Shurdhi. Sipas policisë, aty ndodhej shtetasi Hysen Çela me precedentë penalë, i ashtuquajturi “Neni” i cili po qëllonte me snajper drejt policisë. Rreth orës 13 e 30 ai është arrestuar nga policia dhe është shoqëruar në komisariat.

Grupi në shtëpinë e Altin Shurdhit nuk është i vetmi që po i përgjigjet me armë policisë. Sipas banorëve, në fshat janë edhe dy furgonë me të cilët lëvizin të rinj e adoleshentë të armatosur, tërësisht jashtë kontrollit.

Kreu i komunës, Dasho Aliko, paraditen e sotme bëri thirrje që personat e përmendur nga policia të dorëzohen, ndërsa të armatosurit të dorëzojnë armët në qendër të fshatit. Aliko bën thirrje që fëmijët të mbahen në shtëpi në mënyrë që të mos manipulohen.

Ndërkohë, policia bën të ditur se janë sekuestruar edhe dy laboratorë të përpunimit të drogës, një prej të cilëve ndodhet në ambientet e Gate Mahmutajt dhe tjetri në shtëpinë e vëllait të tij, shtetasit Xhezo Mahmutaj. Grupe speciale të hetimit të orientuara nga Prokuroria për Krime të Rënda dhe Drejtoria për Krimet e Rënda në Policinë e Shtetit, kanë vijuar kryerjen e veprimeve për kryerjen e hetimeve dhe fiksimin e provave materiale paralel me veprimet operacionale të strukturave policore në terren.

Pak pas mesditës së të mërkurës policia doli në njoftim për vijueshmërinë e operacionit në Lazarat.

Në deklaratën e uniformave blu thuhet se janë kontrolluar edhe shtatë banesa të tjera dhe janë asgjësuar 1.5 ton hashash e rreth 2 mijë bimë narkotike kanabis sativa. Janë sekuestruar gjithashtu 3 armë zjarri automatike, 1 armë gjahu çifte si dhe një sasi e konsiderueshme municioni.

Policia: Do qëllojmë pa hezitim ndaj atyre që hapin zjarr

Ministria e Brendshme me anë të një thirrjeje i drejtohet banorëve të
fshatit Lazarat që të mos dalin nga banesat deri në përfundim të
operacionit.

Ndërkohë, në deklaratë thuhet se Policia e Shtetit po vazhdon me
vendosmëri operacionin për kapjen e personave që kanë qëlluar me armë
ndaj uniformave blu si dhe për identifikimin e shkatërrimin e
sipërfaqeve të mbjella me lëndë narkotike në fshatin Lazarat të
Gjirokastrës.

Ministria e Punëve të Brendshme përsërit thirrjen e saj drejtuar
banorëve të Lazaratit që të distancohen hapur dhe prerë nga elementët
kriminalë që synojnë të mbajnë peng gjithë fshatin dhe të ardhmen e tij.

Po ashtu, në funksion të sigurisë së jetës dhe shëndetit të tyre u
kërkohet të gjithë banorëve të fshatit Lazarat që të mos dalin nga
banesat deri në përfundim të operacionit policor. Të gjithë qytetarët e
tjerë duhet të evitojnë plotësisht hyrjen për në fshatin Lazarat deri në
një njoftim të dytë zyrtar të policisë.

Policia i kërkon gjithë banorëve e zonave përreth fshatit Lazarat
këshillohen të bëjnë kujdes me lëvizjen jashtë banesave të tyre, deri në
përfundim të këtij operacioni policor. 

Policia e Shtetit është e vendosur të godasë pa asnjë hezitim dhe pa
paralajmërim këdo që do tentojë të dalë mbi ligjin dhe shtetin e së
drejtës, duke ju kundërvënë me armë uniformave blu.

Rama: Policia po i ngre kokën Shqipërisë
Kryeministri komenton aksionin në FB, i përgjigjet opozitës

E ndërsa operacioni policor në Lazarat ka hyrë në ditën e katërt,
zhvillimet e atjeshme në terren ndiqen me vëmendje nga kryeministri
Rama, i cili ndodhet për një viztë në Gjermani.

Nëpërmjet një komenti në Facebook mëngjesin e së mërkurës, Rama tha:
“Policia e Shtetit po i ngre kokën lartë Shqipërisë në Europë me
operacionin për fshirjen e Lazaratit nga harta europiane e drogës!”.
Rama e mbylli këtë koment me fjalën ‘Mirënjohje’.

Ndërsa gjatë mesditës, në një tjetër mesazh kryeministri komentoi
deklaratat e opozitës për operacionin policor në Lazarat. “S’di a duhet
qarë a qeshur me SHQUP-in që thotë se operacioni është fryt i presionit
të PD!”, shkruan Rama.

Shefi i qeverisë shqiptare i ka drejtuar një pyetje opozitës së sotëme, e
cila qeverisi vendin në 8 vitet e shkuara. “Po a ishin 8 vjet në
pushtet para se të bëheshin SHQUP?”, është pyetja e kryeministrit përmes
të cilës duket se kërkon t’i kujtojë opozitës se Lazarati u “bekua” të
ishte ai fshat që ishte deri 4 ditë më parë nga mosndërhyja e shtetit.

Komentin e tretë, po për këtë çështje, Rama e nis me një pyetje që po
ngrihet shpesh këto ditë. Kur do përfundojë operacioni në Lazarat? Dhe
përgjigja e Ramës është kjo: “Kur të jetë vendosur plotësisht sundimi i
ligjit”. 

Gate Mahmutaj në Tiranë
I dyshuari merret në pyetje nga prokurorët e kryeqytetit

Gate Mahmutaj u soll mesditën e së mërkurës, nën masa të rrepta sigurie në Drejtorinë e Policisë së qarkut Tiranë. Bashkë me të, nga të arrestuarit në Gjirokastër udhëtuan drejt Tiranës edhe Emiljano Aliko dhe Matias Boçi.

Të tre të arrestuarit akuzohen për sulmin me armë ndaj policisë, si edhe për mbjelljen të lëndëve narkotike. Sulmi ndaj policisë konsiderohet një vepër e rëndë penale për të cilën do të hetojë Prokuroria e Krimeve të Rënda.

Gate Mahmutaj u dorëzua në policinë e Gjirokastrës mbrëmjen e së martës, ndërsa dy të tjerët u arrestuan nga forcat RENEA që po kryejnë aksionin në Lazarat.

Mahmutaj, Boçi e Aliko pritet që të dalin përpara Gjykatës së Krimeve të Rënda për vlerësimin e masës së sigurisë ditët në vazhdim.  

Gjirokastër, arrestohen tre adoleshentë
Sulmuan me gurë automjetet e policisë

Policia e Gjirokastrës arrestoi në mesditë disa adoleshentë të cilët sulmuan me gurë automjetet e policisë. Ata shkuan pranë Drejtorisë së Policisë së Gjirokastrës dhe në shenjë proteste për aksionin e policisë në fshatin Lazarat.

Aty ishin edhe disa familjarë të të arrestuarve të mëparshëm që kërkonin lirimin me arsyetimin se të ndaluarit nuk kanë marrë pjesë në asnjë sulm ndaj policisë.

Adoleshentët e ndaluar janë identifikuar me inicialet E.B, K.B dhe B.B, të tre të moshës 17 vjeç, të cilët goditën me gurë makinën e policisë para Drejtorisë së Policisë së qytetit jugor.

Top Channel