Lazarati në “The Guardian”

Qindra policë mësynë fshatin jugor të njohur si një prej kultivuesve më të mëdhenj të marijuanës në Shqipëri, shkruan “The Guardian”, duke nënvizuar përdorimin e granata-hedhëseve, mortajave e mitralozëve për të përcjellë me ngjyra më të gjalla tablonë e asaj çfarë ndodhi në terren një ditë më parë.

Një operacion gjatë të cilit uniformat blu arritën të marrin nën kontroll pjesë të fshatit 5.000 banorësh pas të shtënave me gati 30 persona të armatosur të fshehur në një ndërtesë katërkatëshe, por që pavarësisht ashpërsisë së asaj që mund të përshkruhet si betejë e mirëfilltë, nuk pati viktima.

Bandat e Lazaratit, vazhdon artikulli, besohet të prodhojnë rreth 900 tonë kanabis në vit me vlerë diku tek 4,5 miliardë euro, gati sa gjysma e GDP-së së vendit. Ishin rreth 500 forca policore, përfshirë këtu edhe efektivë të njësive speciale si dhe shefi i policisë, pjesëmarrëse në rrethimin e fshatit pasi një grup më i vogël policësh u zmbraps gjatë fundjavës nga zjarri i armëve të lehta, ku mbeti i plagosur një banor i zonës.

“The Guardian” përmend gjithashtu sulmin ndaj ekipit të televizionit A1 Report, i cili u grabit nga persona të armatosur që më pas i vunë flakën mjetit të tyre. Përgjatë javëve të fundit, autoritetet shqiptare kanë ndërmarrë operacione në rang kombëtar për asgjesimin e plantacioneve të hahashit, vazhdon artikulli.

Bandat e kultivitimit të marijuanës në Lazarat e kanë parë veten për një kohë të gjatë si të paprekshme nga ligji dhe në 2004-n, shton gazeta, duke përmendur detajin që theksonte në shkrimin e tij edhe “Washington Post”, të shtënat nga fshati e detyruan të kthehej mbrapsht një helikopter italian i cili po patrullonte për të identifikuar plantacionet e marijuanës.

Top Channel