“Kosova e Serbia përparim”

Ndërsa sa i përket demokracisë, Kosova, edhe sivjet është përfshirë në grupin e vendeve me regjim gjysmë të konsoliduar autoritar.

Freedom House kujton se në Shkurt të vitit 2013, presidentja e Kosovës Atifete Jahjaga dhe homologu i saj serb, Tomislav Nikolic, janë takuar në Bruksel, duke shënuar takimin e parë midis kryetarëve të dy shteteve, që pasi Kosova ka shpallur pavarësinë.

Raporti përmend edhe marrëveshjen e 19 Prillit, për normalizimin e marrëdhënieve midis Kosovës dhe Serbisë, si dhe zotimet e të dyja palëve për të mos penguar njëra-tjetrën në rrugën drejt anëtarësimit në Bashkimin Europian.

Në tabelën prej shtatë pikësh, ku 1-shi përfaqëson nivelin më të lartë të përparimit demokratik, ndërsa 7 më të ultin, Kosova ka 5.14 pikë. Shifra, përsëri shënon një përparim të vogël nga një vit më herët, kur ka qenë 5.25.

Sa u përket mediave të pavarura, organizata Freedom House raporton për ndërhyrje të qeverisë në transmetuesin publik dhe i jep Kosovës 5.75 pikë; në lidhje me qeverisjen kombëtare 5.50, ndërsa për qeverisjen lokale 4.75.

Sa i përket korrupsionit, Kosova është vetëm një pikë larg vlerësimit më të keq. Në këtë kategori, ajo ka 6 pikë.

Për kushtet, në të cilat funksionon shoqëria civile, Kosova ka 3.75 pikë, ndërsa për kornizën gjyqësore 5.50. Në vlerësimet e kënaqshme për Kosovën theksohet organizimi i  zgjedhjeve dhe transferimet paqësore të pushtetit.

Top Channel