SMS-ja e ish-truprojës së Berishës

Biznesmeni, i cili identifikohet vetëm me inicialet R.H ka paraqitur para gjykatës mesazhin e plotë telefonik ku pretendon se është kërcënuar nga ish-gardisti Skeja dhe Gojart Loci.

“Të kemi futur në rreth. Do na paguash 100 mijë dollarë, përndryshe do marrësh përsipër pasojat”, thuhej në mesazhin elektronik.

Biznesmeni denoncoi rastin në gusht të vitit të kaluar. Lindur në Kalanë e Dodës dhe me banim në Shtetet e Bashkuara ai paraqiti në polici mesazhin telefonik si provë për kërcënimin e marrë.

Shqiptaro-amerikani ka shpjeguar se autorët e kishin kërcënuar seriozisht me jetë, duke i lënë të kuptojë se ia njihnin mirë familjen dhe e kanë urdhëruar të paguajë paratë.

Megjithëse padia u ngrit që në gusht, kur qeveria Berisha ndodhej ende në pushtet, arrestimi i Fatos Skejës dhe Gojart Locit u bë vetëm në muajin dhjetor.

Ish-gardisti është përfolur edhe për rastin e 21 Janarit 2011, kur u akuzua se i kishte ofruar para familjes së Hekuran Dedës, njëri prej 4 viktimave të tragjedisë, në këmbim të vizitës së ish-kryeministrit Berisha në banesën e tyre.

Top Channel