Robert Lewandowski luajti ndeshjen e tij të fundit në “Westfalenstadion” të Dortmund-it, ditën e shtunë, teksa pas një eksperience tepër të suksesshme me verdhezinjtë kërkon të lërë edhe shenjën e fundit të kujtimeve pozitive, duke mposhtur ekipin e ardhshëm të tij Bayern Munchen në finalen e Kupës së Gjermanisë.
Lewandowski nuk mundi të shënonte ndonjë gol në fitoren 3-2, që Dortmundi arriti ndaj Hoffenheim-it, teksa klubi nga “Signal Iduna Park”, siç njihet ndryshe arena e Borussia-s, pritet ta përfundojë sezonin në vendin e dytë, pikërisht pas kampionëve bavarezë të Bundesligës.
Pasi ka njoftuar kalimin e tij te Bayern sezonin e ardhshëm me kosto zero, sulmuesi polak tashmë ka edhe 2 ndeshje për të luajtur me fanelën që e bëri të famshëm në arenën botërore, atë të Dortmund-it, pikërisht në Berlin ndaj Hertha-s vendase javën e ardhshme për kampionat, përpara se të vihet përballë ekipit të tij të ri, në finalen e “DFB Pokal” më 17 Maj.
25-vjeçari u vlerësua me një “standing ovation” këtë të shtunë, teksa ka shënuar 72 gola në 130 ndeshje të luajtura përgjatë 4 viteve të kaluara me Dortmund-in, por kjo nuk mjafton për të, pasi kërkon të lërë edhe një tjetër shenjë, duke ngritur trofeun e Kupës së Gjermanisë.
“Gjithmonë e kam thënë se dua ta mbyll historinë time me Dortmund-in me një titull”, tha Lewa, i cili u shfaq me një buqetë dhe një kolazh fotografik të periudhës së tij në Dortmund. “Dua të falënderoj të gjithë që u përfshinë në këtë ceremoni lamtumire. Jam krenar që gjëra të tilla janë ende të mundshme në botën e fryrë të futbollit”.
Sulmuesi polak ka shënuar 26 gola këtë sezon, në të gjitha kompeticionet, dhe është golashënuesi rekordmen i Dortmundit në Europë, me 18 të tillë. “Ai e meriton këtë ceremoni, gjithnjë ka dhënë maksimumin e tij dhe këtë gjë do të bëjë edhe në 2 takimet e mbetura”, theksoi trajneri i Dortmund-it, Jurgen Klopp.
Top Channel
