Diego Simeone, trajneri i Atletico Madrid, habiti të gjithë kur në fund të konferencës së shtypit të dhënë pas fitores 1-3 që skuadra e tij arriti ndaj Chelsea falenderoi nënat e lojtarëve të tij.
“Dua të falenderoj mamatë e këtyre futbollistëve pasi ato kanë lindur burra të vërtetë”, tha trajneri argjentinas.
Më tej, Simeone tha se Atletico do e luajë finalen ndaj Real Madrid duke e ditur se tifozët e bardhekuqve kanë pritur shumë vite për një ndeshje të tillë.
“Njihemi mirë, kemi luajtur shumë herë ndaj njëri-tjetrit dhe e dimë që përballë kemi një klub të fuqishëm, të mësuar me ndeshje të tilla, por ne kemi motivim të madh pasi kemi pritur shumë vite për këtë takim”, tha trajneri Simeone.
Ja si e analizon ai ndeshjen ndaj Chelsea: “Reagimi pas pësimit të golit ishte përcaktues. Fillimi i pjesës së dytë për ne ishte shumë i mirë. E kuptuam që pasimet e shpejta mes Suarez dhe Tiago vinin në vështirësi Willian, Luiz dhe Ramires.”
Top Channel
