Luis Enrique është gjithnjë e më pranë Barcelonës. Ish-trajneri i Romës pëlqehet shumë nga tifozët “blaugrana”, të zhgënjyer nga puna e Gerardo Martino-s, teksa është vet sulmuesi i Celta Vigo-s, Nolito, ai që konfirmon zërat gjithnjë e më këmbëngulës për trajnerin e tij aktual.
“Është një trajner i mrekullueshëm për Celta-n dhe ndihemi të gjithë entuziastë, por jam i shqetësuar se mund të largohet. Nëse Barcelona do ta kërkojë, ai do të ikë menjëherë. Kush nuk do të donte të drejtonte Barçën?”.
Për Luis Enrique-n, dashuria për Barcelonën nuk është venitur kurrë. Në kohët e Guardiola-s ka udhëhequr me sukses skuadrën B të katalanasve, por më pas vendosi të ndryshojë ambient dhe për të provuar pikërisht atë hapin e rritjes kualitative te Roma.
Një eksperiencë që nuk përfundoi ashtu siç do të donte ai, por ndoshta edhe çështje fati, gjë që uli bindshëm kuotat e tij me largimin e Guardiolës. Por, tani, “blaugranat” kanë nevojë të bëjnë kthesën, pas një sezoni tepër zhgënjyes.
Ndoshta Luis Enrique mund të jetë edhe njeriu i duhur për të t’i dhënë furçën e fundit Messit & Co. Nga tifozët e ka rrugën e hapur për në “Camp Nou”, madje e ka pasur prej kohësh, por fjalët e Nolito-s duket se po japin një indicie rreth asaj që pritet të ndodhë merkaton e verës, pasi ky sezon të përfundojë.
Ndërkohë, në ndeshjen kundër Getafe-s për La Liga, këtë fundjavë, Barcelona ka bërë të ditur se do të zbresë në fushën e lojës me një dedikim special në fanelën e lojtarëve të saj.
“Tito, Per Semper Etern” – (Tito, përgjithmonë i pavdekshëm) – është pikërisht shënimi që i dedikohet trajnerit katalanas Tito Vilanova, i ndarë nga jeta vetëm pak ditë më parë nga një sëmundje tumorale, ndërkohë që u kanë bërë edhe një apel tifozëve, për t’u paraqitur në “Camp Nou 10 minuta më herët, në mënyrë që të shohin një video tribut për trajnerin që i nxorri kampion të La Ligës, ndërkohë që pati edhe më shumë suksese si ndihmës i Pep Guardiolës.
Veç kësaj, klubi katalanas ka krijuar edhe një adresë poste elektronike, në të cilën tifozët mund të dërgojnë mesazhet e lamtumirës për Tito Vilanova-n: [email protected].
Top Channel
