Policia spanjolle ka bërë të ditur arrestimin e një spektatori, i cili dyshohet t’i ketë hedhur bananen futbollistit brazilian të Barcelonës, Dani Alves, gjatë fundjavës së kaluar.
Incidenti racist ndodhi në momentin kur futbollisti ishte duke ekzekutuar një goditje nga këndi, në ndeshjen Villarreal-Barcelona, të dielën e kaluar. Incident, të cilit Alves iu përgjigj duke zhveshur e më pas duke e kafshuar bananen, xhest ky që mori lavdërime nga mbarë bota dhe u bë shkak për nisjen e një fushate madhore në rrjetet sociale, kundër racizmit.
Personi i arrestuar është identifikuar si një 26-vjeçar, tifoz i Villarreal, i njohur me emrin David Campaya Lleo, bëjnë të ditur mediat lokale.
Klubi kishte deklaruar më parë se personit të përfshirë në këtë incident i është anuluar abonimi vjetor, si dhe i është pezulluar përjetë hyrja në stadium.
Mbrojtësi i Barcelonës u shpreh i surprizuar nga mbështetja e madhe e marrë pas veprimit me bananen, teksa ekipi i tij e fitoi atë ndeshje me përmbysje, nga 2-0 në 2-3, në “El Madrigal”, stadiumin e Kastejonit në Spanjë.
Alvesh tha për BBC Brasil të mërkurën se ky nuk ishte “një incident i izoluar” dhe se kishte denoncuar ofendime raciste për të paktën 6 vjet. “Shpresoj që kjo fushatë të jetë një këmbanë alarmi për të ndaluar njëherë e përgjithmonë një sjellje të tillë nga futbolli, për ta ndaluar të gjithë së bashku. Shpresoj që debati mbi paragjykimet racore të mos lihet mënjanë, por të luftohet përfundimisht dhe të mos zhduket vetëm nga bota e futbollit, por në të gjitha aspektet e jetës”, shtoi ai.
Top Channel
