“Senna dëshironte të garonte për Ferrari-n dhe unë e doja në skuderinë time”. Kështu është shprehur Luca Cordero di Montezemolo në zbulimin që ka njoftuar përmes uebsajtit zyrtar të skuderisë nga Maranello.
Piloti brazilian është takuar me kreun e “kokëkuqes” për të hedhur bazat e një transferimi të bujshëm në Itali. “Më kishte thënë në mënyrë të qartë se donte ta mbyllte karrierën e tij te Ferrari, pasi kishte pasur edhe një tentativë 1 vit më parë”.
Montezemolo, president i “kokëkuqes”, zbulon edhe sekrete të tjera të raportit të tij me kampionin e Formula 1, i cili u nda nga jeta pas një aksidenti të rëndë në pistën e “Imola”-s në Monza të Italisë.
“Kishim rënë dakord për t’u takuar shumë shpejt, në mënyrë që të kuptonim se si mund të tejkalonim kufizimet kontraktuale që kishte në atë moment. Të dy ishim të mendjes se për një pilot si ai, Ferrari do të ishte mënyra më e mirë për t’i dhënë fund karrierës së tij, e cila edhe deri atëherë kishte qenë e shkëlqyer, për të mos thënë unike. Megjithatë, fati i mori nga gjiri ynë Ayrton-in dhe Roland Ratzenberg, në një nga fundjavat më të trishta të Formula 1. Nga Senna më kujtohet xhentilesa dhe thjeshtësia e tij, që dukej disi si ndrojë, ekstremisht ndryshe nga sa dukej Senna si pilot, një luftëtar i vendosur gjithnjë për të marrë maksimumin”.
Top Channel
