Përpara vërshëllimës së parë të dy takimeve të kthimit, për gjysmëfinalet e Champions League, Bayern-Real Madrid, të martën, dhe Chelsea-Atletico Madrid, të mërkurën, do të mbahet nga 1 minutë heshtje, si homazh për Tito Vilanova-n dhe Vujadin Boskov, të cilët kanë ndërruar jetë ditët e fundit.
Lajmi njoftohet nga organi më i lartë drejtues i futbollit europian, UEFA. Në ekranet e stadiumeve respektive, “Allianz Arena” dhe “Stamford Bridge”, do të shfaqen montazhe me imazhet e dy trajnerëve, njëri që ka drejtuar Barcelonën për 1 vit dhe njihet më shumë si ndihmës i Guardiolës, ndërsa tjetri, tekniku serb, ka drejtuar klube si Real Madrid dhe Sampdoria duke i shpallur kampionë, ndërsa suksesin më të madh e ka arritur me kombëtaren e ish-Jugosllavisë, me të cilën arriti deri në çerekfinalet e Europianit 2000.
Skuadrat janë të lira për të vendosur nëse do të mbajnë shiritin e zi në krah, ndërsa pas minutës së heshtjes do të jepet edhe një komunikatë e shkurtër, në gjuhët respektive të skuadrave që do të zbresin në fushë, pra spanjisht, gjermanisht dhe anglisht.
Top Channel
