Bosi i Formulës 1, Bernie Ecclestone, ka mohuar akuzat për ryshfet në seancën e parë të gjyqit të tij në Mynih.
Ai akuzohet se ka dhënë 45 milionë dollarë ryshfet ndaj një bankieri gjerman, për të siguruar shitjen e një pjese aksionesh të biznesit të tij në F1, drejt një kompanie që favorizohej prej tij.
Ecclestone pranon se ka paguar Gerhard Gribkowsky-n, i cili është dënuar me burg për marrjen e këtyre parave, por ka mohuar të ketë shkelur ligjet.
Ai vazhdon të drejtojë biznesin e Formula 1, ditë pas dite, pavarësisht akuzave. E megjithatë, për të lehtësuar disi ngarkesën e punës, Ecclestone ka hequr dorë nga një numër pozicionesh të lidhura me F1, deri sa çështja ndaj tij të mbyllet.
Në momentin e fillimit të gjyqit, avokatët e tij lëshuan një deklaratë, ku konfirmuan se ai do të luftojë për të pastruar emrin e tij.
“Ryshfeti, për të cilin akuzohem, nuk ka ndodhur kurrë. Pretendimet e prokurorëve bazohen në deklaratat e zotit Gribkowsky-t, të cilat janë të gabuara, mashtruese dhe jo përfundimtare”, lexohej në deklaratën e tyre.
Korrespondentët thonë se ai u shfaq i qetë, teksa konsultohej me avokatët e tij, përpara se të nisnin procedurat.
I pyetur nga një gazetar jashtë gjykatës, nëse ishte i bindur për fitoren e këtij gjyqi, ai u përgjigj: “Jam i bindur se dielli po shkëlqen”.
Pagesa, për të cilën akuzohet Ecclestone, është bërë gjatë periudhës Korrik 2006-Dhjetor 2007.
Nëse shpallet fajtor, Ecclestone, një nga njerëzit më të pasur të Britanisë, i cili e transformoi Formula 1 në një sport fitimprurës të parë nga mbi 450 milionë teleshikues në të gjithë botën, mund të dënohet deri në 10 vjet burgim.
Top Channel
