Thyhet tabuja e Guardiolës përball Realit të Madrid-it, pasi është Ancelotti ai që fiton duelin e parë, duke mundur 1-0 Bayern-in në “Santiago Bernabeu”.
Në këtë gjysmëfinale të Champions League kanë dhuruar spektakël të dyja skuadrat, gjermanët e Guardiolës me lojën e tyre karakteristike, me shumë pasime dhe Reali i Ancelotti-t i kujdesur në pritje të kundërsulmeve fatale.
Pikërisht nga një kundërsulm i tillë ka arritur të përfitojë Benzema, i cili është gjetur i lirë, duke shënuar golin e parë dhe të vetëm të kësaj ndeshjeje në minutën e 19-të.
Nuk kanë munguar rastet e pastra të madrilenëve, por kanë gabuar si Di Maria ashtu edhe Ronaldo.
Ndërkohë lojtarët e Bayern-it me pasimet e shumta pak herë kanë arritur të gjenden përball Casillas. Në minutat e fundit të ndeshjes, i sapo futuri në fushë për gjermanët, Mario Gotze pati një mundësi të artë për të barazuar shifrat, por Casillas ka treguar që mbetet një portier i madh, duke i mohuar golin.
Gjithsesi asgjë nuk është mbyllur për kualifikimin, pasi do të jetë sfida e kthimit pas një jave në “Allianz Arena” ajo që vendos skuadrën që kalon më tej.
Top Channel
