Sebastian Vettel është shumë i zhgënjyer me vendin e 12 në provat zyrtare të garës së parë sezonale të Formulës 1. Gjermani i Red Bullit nuk u kualifikua dot në Q3 në Melburn të Australisë dhe tha para mediave se skuadra ka shumë punë për të bërë në kuadër të garës.
“Nuk mund të jem i kënaqur me një rezultat të tillë. Duhet të punojmë shumë me makinën, të kuptojmë shumë gjëra dhe të mundohemi të përmirësohemi për të dielën”, tha 4 herë kampioni i Formulës 1.
Gjithsesi, Vettel nuk i ka humbur shpresat: “Gara është e gjatë dhe mund të ndodhë gjithçka.”
Piloti gjerman e sheh si fakt pozitiv paraqitjen e shokut të tij të skuadrës Daniel Ricciardo, i cili do të niset nga vendi i dytë: “Unë nuk u ndjeva fare mirë me makinën sot. Shpresoj që Ricciardo të vazhdojë pa probleme në garë.”
Gara e parë e sezonit të Formulës 1 do të zhvillohet të dielën në orën 07:00 dhe mund ta ndiqni drejtpërdrejtë në Top Channel.
Top Channel
