A e dini se cili është stadiumi i parë në botë, që ndryshon tërësisht ngjyrat e pamjes së jashtme? Në foton e këtij artikulli shfaqet “Allianz Arena”, stadiumi i Mynihut, i cili kthehet në diçka magjepsëse dhe verbuese, sa herë që ndriçohet gjatë zhvillimit të një ndeshjeje…
Stadiumi ku zhvillojnë ndeshjet e tyre Bayern Munchen, Munchen 1860 dhe jo rrallë herë edhe kombëtarja e Gjermanisë, ndryshon “petkun” sipas rastit. Panelet pneumatike të tij ndriçohet respektivisht në të kuqe për gjigantët bavarezë, në ngjyrë blu kur aty luan 1860-a, si dhe në të bardhë kur aty luan “Die Nationalmannschaft”.
Fotoja e mëposhtme është marrë gjatë ndeshjes së të mërkurës së kaluar, gjatë fitores 3-1 të Bayern Munchen ndaj Manchester United, për takimin e dytë të çerekfinaleve të Champions League.
E megjithatë, pavarësisht se rezultati i siguruar e shtyn ekipin e drejtuar nga Pep Guardiola drejt gjysmëfinaleve, që do t’i zhvillojë me Real Madrid, “Allianz Arena” nuk ka rezultuar gjithnjë një platformë fatsjellëse për gjigantët gjermanë, sidomos në kompeticionin më madhor të Europës.
Në finalen e Champions League 2012, Bayern ishte thuajse kampion, deri kur Didier Drogba i Chelsea-t shënoi me kokë golin e barazimit dhe, i ndihmuar edhe nga Peter Cech që priti goditjen nga 11-metërshi të Arjen Robben në kohët shtesë, “blutë” e Londrës përmbysën gjithçka për të fituar me penallti 4-3.
Bayern bëri kthesën duke fituar kompeticionin vitin e kaluar dhe, nëse arrijnë të kalojnë Real Madridin këtë vit, do të mund të shkojnë në Lisbonë për të diskutuar finalen e 4-t të Champions League në 5 sezonet e fundit, pikërisht ndaj Chelsea-t ose Atletico Madrid.
Top Channel
