Merkel: Jo paralele Kosovë-Krime

“Situata në rajonin e Krimesë të Ukrainës nuk mund të krahasohet me rastin e Kosovës në Ballkan”, deklaroi Merkel gjatë një fjalimi në Parlamentin e Gjermanisë.

Më tej kancelarja akuzoi Rusinë se, në vend që të veprojë si partnere për zgjidhjen e krizës së Ukrainës, ajo punon për të shfrytëzuar dobësinë e fqinjit të vet.

“Integriteti territorial i Ukrainës nuk mund të vihet në pikëpyetje”, tha Merkel, e cila së fundmi ka shprehur disa herë mbështetjen e saj ndaj opsionit të sanksioneve ndaj Moskës.

Autoritetet ruse disa herë kanë krahasuar situatën në Krime, e cila pritet të mbajë një referendum për pavarësi nga Ukraina, me atë të Kosovës.

Krahasimet janë bërë nga vetë presidenti Putin, me argumentin se, kur një gjë të tillë e bëri vendi ballkanas, përse të mos e bëjë edhe gadishulli me shumicë ruse.

Deklarata e tij u pohua edhe nga ambasadori i Federatës Ruse në Tiranë, Leonid Abramov, në një intervistë dhënë për Top Channel më herët gjatë muajit.

“Presidenti Putin kujtoi gjatë konferencës për shtyp edhe historinë e popullit të Kosovës, që në kushtet e sigurisë së arritur ka arritur të shprehë vullnetin e vet. Në rast se ndodhi njëherë kështu, pse mos të përsëritet kjo praktikë”, tha ai.

Top Channel