Perandoritë shpesh shpërthejnë, ndërsa të tjera munden nga fuqi më të mëdha.
Red Bull, pas testimeve dimërore duket se ka humbur besimin tek vetja te dominimit disavjeçar.
Në Formulën 1 rregullat ndryshojnë për fat të mirë apo të keq në disa raste dhe pikërisht këtë herë Red Bull kupton se ka humbur hegjemoninë.
Ende ata nuk e kanë humbur titullin kampion për pilotë apo për konstruktorë, por po përgatiten që në këtë fundjavë, në Australi, garën e parë të këtij sezoni 2014, të mos jenë aty ku ishin në fund të 2013-s.
Ndryshimet e mëdha e kanë shkartisur mirë rendin e të fortëve apo të dobtëve të sezonit të fundit, kombinimi i motorëve 1.600 kubik me një turbo dhe limitimi i karburantit me 100 litra, kanë bërë shumë gjëra të paprashikueshme edhe për vetë pilotët e mekanikët.
Në një kohë kur disa drejtues e konsiderojnë problematike situatën, pasi mendojnë se do të garojnë të kursyer për gomat e karburantin, të tjerët e mendojnë tërheqëse këtë situatë të paqartë, madje që nga gara e parë.
Dhe Formula 1 këtë gjë e garanton, ndoshta më shumë se cdo herë, në prag të këtij sezoni 2014-të, i cili si cdo vit edhe këtë herë nuk do të mungojë në ekranin e “Top-Channel”, duke filluar nga fundjava e ardhshme me Çmimin e Madh të Australisë dhe deri në muajin nëntor me garën e Abu Dabit, ku për herë të parë në historinë e këtij sporti, kjo garë do të vlejë sa dyfishi i pikëve të secilës garë, për të mbajtur këdo, me ankthin dhe emocionin e kategorisë mbretërore të automobilizmit, siç quhet ndryshe Formula 1.
Top Channel
