Champions League, Juventusi, Milani dhe Interi ishin në qendër të vëmendjes së trajnerit të kombëtares së Rusisë, Fabio Capello, në një intervistë të dhënë për të përditshmen “La Gazzetta dello Sport”.
Favoritët në Champions League – “Unë besoj se Reali është favorit për të fituar të gjithë kompeticionet në të cilën luan, pasi ka një përbërje të mrekullueshme në skuadër. Jo vetëm kaq, por rendimenti i ekipit po përmirësohet ndeshje pas ndeshje. Mendoj se çelësi për këtë përmirësim kanë qenë futbollistë si Modriç apo Di Maria, të cilët janë në gjendje të zhvillojnë një futboll sulmues, duke ofruar një mbulim të madh pas”.
Shanset e Milanit – “Përballë Atleticos, në Champions, Milani duhet të luajë në të dyja ndeshjet, i vetëdijshëm se një rënie e thjeshtë e vëmendjes mund të rezultojë fatale. Megjithatë, ata kanë disa armë të rëndësishme për të kundërshtuar forcën e kundërshtarëve. Kaka, Balotelli dhe besoj edhe Pazzini mund të jenë në gjendje të dhurojnë me të vërtetë surprizën”, shtoi Capello.
Dy fytyrat e Juventusit – Prej disa vitesh, Juventusi dominon bindshëm në Serinë A, por rezultatet në Europë vazhdojnë të jenë zhgënjyese. Capello ka një shpjegim të thjeshtë për këtë: “Kampionati italian nuk është më edhe aq konkurrues. Nëse shikon ndjekësit e tyre, Roma, Napoli dhe Fiorentina, në merkaton e shkuar shitën Lamelën, Cavanin dhe Jovetiç, elementët më të mirë të skuadrave të tyre. Më parë i kanë zëvendësuar mirë, por ndërkohë Juventusi u fuqizua më tej, duke marrë futbollistë të shkëlqyer si Tevez e Llorente, ndërsa mbajti në skuadër të gjithë të tjerët”.
Sezoni i Interit – “Rezultatet e këqija nuk janë vetëm përgjegjësi e Mazzarit. Ndryshimet e pronësisë kanë gjithmonë si efekt shpërqëndrimin, aq më shumë kur kjo ndodh pas shumë vite me radhë të drejtimit të Morattit. Hernanes është një zgjedhje e mirë, por Mazzari duhet të marrë prej tij atë që ai jep në kombëtare. Për brazilianët është gjithmonë kështu, në kombëtare japin gjithmonë më shumë se sa për klubet”.
Top Channel
