Takimi historik Kinë-Tajvan

Wang Yu-Chi dhe Zhang Zhijun, dy zyrtarët më të lartë që mbikqyrin marrëdhëniet dypalëshe në vendet përkatëse, u takuan në një samit 4-ditor në qytetin e Nanjingut.

Asnjë axhendë zyrtare nuk u publikua për këto takime, të cilat konsiderohen prej ekspertëve si një test i ndërsjelltë besimi përpara angazhimit në bisedime më të thella.

Kina e konsideron Tajvanin si pjesë të territorit të saj dhe në të shkuarën, bisedmet e vetme që janë mbajtur midis dy palëve kanë qenë ato të realizuara në kuadrin e organizatave ndërkombëtare ku të dy vendet janë anëtare.

Zhang, kreu kinez i zyrës së marrëdhënieve me Tajvanin u shpreh optimist për përmirësimin e relatave në një të ardhme të afërt, duke thënë se “është e pamundur të imagjinohej ky takim deri pak kohë më parë”.

Nga ana e tij, homologu tajvanez i cilësoi këto takime si “fillimin e një kapitulli të ri në marrëdhëniet midis dy shteteve”.

“Për ne, fakti i vetëm që jemi ulur në një tavolinë për të biseduar mbi çështje të ndryshme është një hap i madh përpara”, tha Wang.

Për shkak të ndjeshmërisë së çështjes, në dhomën ku u zhvillua takimi nuk figuronin flamujtë kombëtarë të asnjërit prej dy vendeve.

Tajvani u shpall i pavarur në vitin 1949, pasi forcat nacional-demokratike që humbën në luftën civile u zhvendosën në ishull, ku themeluan një shtet të ri.

Pekini këmbëngul që Tajvani është pjesë e Kinës dhe nuk e ka fshehur kurrë synimin për të rifituar këtë territor.

Top Channel