Pjesëtarë të familjeve mafioze si Gambino dhe Bonanno kanë qenë mes 24 personave të arrestuar gjatë së martës në New York dhe disa qytete të Italisë, pas një maksi-operacioni antimafia, bëjnë të ditur autoritetet.
FBI dhe policia italiane ndërmorën operacionin “Ura e re”, që kishte në shënjestër mbi 40 persona për trafik ndërkombëtar droge dhe krim të organizuar, në lidhje me mafian e kalabreze.
Policia italiane arrestoi 17 të dyshuar, njoftoi prokurori antimafia Franco Roberti për reporterët, gjatë një konference për shtyp në Romë. FBI-ja arrestoi 7 persona në New York, pas një sulmi të koordinuar, – shtoi ai, – përfshi dhe anëtarë të familjeve Gambino dhe Bonanno.
Zyra e Prokurorit të SHBA-ve në Distriktin Lindor të New York-ut njoftoi edhe emrat e 7 të dyshuarve: anëtari i ‘Ndrangheta’-s Raffaele Valente, i njohur ndryshe si “Lello”, asociuesi i Gambino-ve Franco Lupoi, asociuesi i Bonanno-ve Charles Centaro, i njohur ndryshe si “Charlie Pepsi”, Dominic Ali, Alexander Chan, Christos Fasarakis dhe Jose Alfredo Garcia, i njohur ndryshe si “Freddy”.
Të pandehurit akuzohen për trafikim lëndësh narkotike, pastrim parash dhe sulme me armë zjarri, “bazuar veçanërisht në pjesëmarrjen e tyre në konspiracionet internacionale të heroinës dhe kokainës, përfshi dhe ‘Ndrangheta-n’, një prej sindikatave më të fuqishme të krimit të organizuar”, thuhej në publikimin e mësipërm.
Të 7 të akuzuarit nuk pranuan fajësinë të martën, pas një sërë akuzash në gjykatën federale të Brooklyn. Më pas, 4 prej tyre, – Valente, Lupoi, Chan dhe Garcia, – janë arrestuar pa të drejtë lirimi me kusht, një opsion që do të merret në konsideratë më vonë. Veç akuzave për drogën dhe pastrimin e parave, Valente dhe Lupoi akuzohen gjithashtu edhe për shitjen e silenciatorëve të paregjistruar të armëve të zjarrit.
Ndërkohë, Centaro, Fasarakis dhe Ali janë lënë të lirë me kusht. Duke qenë se këtyre u janë sekuestruar pasaportat, edhe lëvizja brenda territorit të Shteteve të Bashkuara do të jetë e kufizuar për ta.
Detyrimi i lirimit me kusht për Ali ka qenë 1,4 milionë dollarë, ndërkohë që për dy të tjerët nga 1 milionë dollarë. Hetuesit, të cilët kanë folur në një konferencë për shtyp në Romë, thanë se paratë e gjetura gjatë ofensivës shkojnë me qindra-mijëra dollarë.
Operacionet në Itali janë zhvilluar në rajonin jugor të Kalabrisë, zona e preferuar e sindikatës së ‘Ndrangheta-s’, si dhe në qytetet e Napolit, Kazertës, Torinos, Beneventos dhe Katanxaros. Familja mafioze italiane e përfshirë në aleancë, apo në “Urën e re”, së bashku me familjen Gambino, quhet Ursino Ionica.
Operacioni i së martës ka qenë i pari në histori i kryer në bashkëpunim mes policisë amerikane dhe asaj italiane, të cilët kanë goditur lidhjet mes familjeve mafioze të ‘Ndrangheta-s’ në të dy vendet, thanë hetuesit.
Prokurorët e antimafias në Kalabri kanë nisur një hetim që prej 2 vjetësh, teksa policia italiane ka hartuar një raport 2000 faqesh, ku detajohen gjithçka është mësuar, përfshi informacionet nga përgjimet telefonike.
Top Channel
